Սաուդյան Արաբիայում մեկնարկել են լրագրող Ջամալ Հաշոգիի (նաև՝ Խաշոգջի) սպանության գործով դատական լսումները, որին այսօր ներկա են եղել 11 մեղադրյալներն ու նրանց պաշտպանները:
Պետական մեղադրողը պահանջել է մահապատժի դատապարտել մեղադրյալներից հինգին: Սաուդական քննչական խումբը դեռևս սպասում է թուրք գործընկերների կողմից տրամադրվելիք ցուցմունքներին և ապացույցներին: Մի խումբ կասկածյալների հարցաքննությունը շարունակվում է:
The Washington Post-ի սյունակագիր Ջամալ Հաշոգին հոկտեմբերի 2-ին մտել էր Թուրքիայում իր երկրի հյուպատոսարան ու անհետացել: Միջազգային, այդ թվում՝ թուրքական որոշ աղբյուրների տվյալներով՝ Հաշոգին սպանվել է հյուպատոսարանում, իսկ նրա դին դուրս է բերվել դիվանագիտական ներկայացուցչության տարածքից և մինչ օրս չի հայտնաբերվել:
Թուրքական աղբյուրները նաև պնդում են, որ Հաշոգիի սպանությունն իրականացնելու համար Սաուդյան Արաբիայից հատուկ ծառայությունների աշխատակիցների խումբ է ժամանել, որի անդամները, մի քանի ժամ մնալով Ստամբուլում, վերադարձել են հայրենիք: Էր-Ռիյադը կտրականապես հերքում է այս մեղադրանքները:
