«Ազատության» հետ զրույցում Բատիկյանը նշեց, որ գործարարն այժմ գտնվում է հիվանդանոցում և դատաբժշկական փորձաքննության շրջանակներում անցնում է նշանակված հետազոտությունները։
«Դատարանում չէր ինքը։ Ինքը դատաբժշկական փորձաքննության շրջանակներում գտնվում է հիվանդանոցում, հետազոտվում է լրացուցիչ: Ես միանձնյա ներկայացրել եմ գրավի միջնորդությունը, բավարարվեց առաջին ատյանի դատարանի կողմից։ Ինքը գտնվում է հիվանդանոցում, այս պահին էլ հիվանդանոցում է գտնվում և մնալու է էստեղ: Տուն էլ չի գնալու», - ասաց Մարյապետյանի պաշտպանը։
«Ազատության» հարցին, թե ո՞ր հիվանդանոցում է գտնվում Մայրապետյանը, Բատիկյանը պատասխանեց. - «Հիվանդանոցը, ներողություն, չեմ կարող ասել, որովհետև անձնական տեղեկություն է»։
Ըստ պաշտպանի՝ դատարանը որոշումը կայացրել է՝ հաշվի առնելով Մայրապետյանի առողջական վիճակը։
Բատիկյանի խոսքով, նրա ունեցած խնդիրներն անհամատեղելի էին կալանքի հետ․ - «Առարկեց քննիչը, ներկայացրեց հիմնավորումը․․․ բայց արդեն կյանքի խնդիր էր»:
Թեև գործարարը ազատության մեջ է ու, ըստ Բատիկյանի, չի խուսափելու նախաքննությունից, սակայն փաստաբանը տեղեկացրեց, որ Եվրոպական դատարանին ուղղված դիմում են նախապատրաստում․ - «Անկախ միջնորդությունը բավարարելու, իր ազատության մեջ լինել-չլինելուց: Դիմում են, որ խափանման միջոց են կիրառել հիվանդ մարդու նկատմամբ»:
Սամվել Մայրապետյանը ձերբակալվել է հոկտեմբերի 6-ին: Նրան «կաշառք ստանալուն օժանդակելու» մեղադրանք է առաջադրվել: Մինչև օրս քննչական մարմինները չեն պարզաբանել, թե կոնկրետ ինչ գործի շրջանակում էր կալանավորվել գործարարը:
Մայրապետյանը գործունեություն է ծավալում շինարարության ոլորտում, «Տոյոտա Երևան» ընկերության նախագահն է, նրան է պատկանում Հ2 հեռուստաընկերությունը:
Հանրության լայն շրջանակներին Սամվել Մայրապետյանը հայտնի դարձավ Հայաստանի երկրորդ նախագահ Ռոբերտ Քոչարյանի օրոք մայրաքաղաքի Հյուսիսային պողոտայի կառուցման ժամանակ, երբ տարածքներ ձեռք բերեց այդտեղ:
