Միացյալ Նահանգների Սենատը կողմ է քվեարկել երկու բանաձևերի, որոնք մեղադրում են Սաուդյան Արաբիայի թագաժառանգ Մուհամեդ բին Սալմանին լրագրող Ջամալ Հաշոգիի (նաև՝ Խաշոգջի) սպանության համար և կոչ անում դադարեցնել աջակցությունը արաբական երկրին՝ Եմենում շարունակվող պատերազմում:
Էր-Ռիյադը Եմենի տարածքում զինված հակամարտությանը մասնակցում է ԱՄՆ-ից ձեռք բերված ռազմական օդանավերի օգնությամբ, որոնցից ռմբակոծում է Իրանի աջակցությունը վայելող հութի զինյալներին:
Պատերազմում Սաուդյան Արաբիային աջակցությունը դադարեցնելու կոչով բանաձևը, որն ընդունվել է սաուդցի լրագրողի սպանության պատճառով, առայժմ օրենքի կարգավիճակ չունի՝ դրա համար պահանջվում են մի շարք լրացուցիչ քայլեր:
The Washington Post-ի թղթակից, Սաուդյան Արաբիայի ամենահայտնի ընդդիմադիր լրագրողներից համարվող 59-ամյա Ջամալ Հաշոգին անհետացել է հոկտեմբերի 2-ին` Ստամբուլում իր երկրի հյուպատոսություն այցելելուց հետո: Ըստ Թուրքիայի քննիչների՝ նրան հյուպատոսարանում դաժանաբար սպանել են սաուդյան հատուկ ծառայությունների աշխատակիցները: Լրագրողի դին մինչ օրս չի հայտնաբերվել:
