Չինական «Սինոհիդրո Քորփորեյշն» ընկերության ենթակապալառու «Սթոունս» ընկերության աշխատակիցներ պահանջում էին իրենց 3 ամսվա աշխատավարձը:
Անիի ոստիկանապետ Ասքանազ Դավթյանը փորձում էր համոզել բացել ճանապարհը, մինչև կազմակերպության ղեկավարները կհասնեն ու կբանակցեն աշխատակիցների հետ:
Թեժ վիճաբանությունից հետո ճանապարհը բացեցին ու մեկ ժամ ժամանակ տվեցին, որ «Սթոունս» ընկերության ղեկավար Սուրեն Ավագյանը գա ու աշխատավարձերը վճարի:
Ասում են, որ այլևս խաբվել չեն ուզում․ - «Իրեք ամիս խաբեցին․․․ վաղը կտանք, մյուս օրը կտանք․․․ Վերջը որոշեցինք, որ ճամփեն պտի փակենք: Մենք մեր քրտինքն ենք պահանջում»:
Մեկ ժամ անց եկավ ընկերության անվտանգության պատասխանատուն, ցուցարարների ներկայությամբ զանգեց «Սթոունս»-ի ղեկավար Սուրեն Ավագյանին, ով ասաց, թե բանկ է գնում գումար վերցնի ու ժամը 16-ին Մարալիկ կգա՝ աշխատավարձերը վճարելու:
Բողոքող աշխատակիցներին լուրեր են հասել, որ «Սթոունս» ընկերությունը պարտքեր ունի և սնանկացման եզրին է: Նրանք մտավախություն ունեն, որ իրենց կարող են խաբել ու այդպես էլ աշխատավարձ չվճարել:
Ժամը 16-ին «Սթոունս» ընկերության ղեկավար Սուրեն Ավագյանը եկել էր հանդիպման: Աշխատակիցները փոխանցեցին, որ ընդամենը 3 մլն դրամ էր բերել, որը աշխատավարձի պարտքն ամբողջովին չէր փակի: Աշխատակիցները հրաժարվել են մասնակի պարտքը մարելու տարբերակին ու կարճ ժամանակով կրկին փակել են Գյումրի - Երևան ճանապարհը:
«Սթոունս» ընկերության ղեկավար Սուրեն Ավագյանը խոստացել է ուրբաթ օրը ամբողջությամբ փակել աշխատավարձի պարտքը: