Կառավարության որոշմամբ Բնապահպանության նախարարի տեղակալ Գնել Սանոսյանը կղեկավարի Գեղարքունիքի մարզը, Անդրեյ Ղուկասյանը՝ Լոռու, իսկ Վայոց ձորը՝ Տրդատ Սարգսյանը։
Վերջինս Երևանի նորընտիր ավագանու անդամ էր, լրագրողների հետ զրույցում ասաց ընդունել է մարզպետ դառնալու առաջարկը, քանի որ ծնունդով Վայոց ձորից է ու կարծում է, որ հեղափոխությունը ամբողջությամբ դեռ չի հասել մարզ․ - «Միշտ Վայոց ձորի բնակչությունը իր դժգոհություններն են հայտնում, որ հեղափոխությունը չի հասել Վայոց ձոր, և երբ առաջարկը ստացա մարզպետ լինելու, առանց երկար մտածելու, միանգամից համաձայնվել եմ, որպեսզի հեղափոխության շունչը և հեղափոխությունը հասնի Վայոց ձոր, և բնակիչներն իրենց կյանքի վրա զգան այդ փոփոխությունը»:
Գեղարքունիքի նորանշանակ մարզպետ Գնել Սանոսյանի օրակարգում մարզից արտագնա աշխատանքի մեկնողների թիվը նվազեցնելն է։
Սանոսյանն ասաց, որ որպես Բնապահպանության փոխնախարար, հասցրել է ծանոթանալ մարզի հիմնական խնդիրներին։
Լոռու նորանշանակ մարզպետ Անդրեյ Ղուկասյանն, որը մինչ այս զբաղեցնում էր մարզպետի տեղակալի պաշտոնը, նշեց, որ նպատակն է զարգացնել զբոսաշրջությունը մարզում․ - «Արտագնա աշխատանքը երկակի ազդեցություն ունի․ տնտեսական առումով ձեռնտու է, բայց մյուս կողմից ամիսներ շարունակ մարդիկ կտրվում են իրենց ընտանիքներից: Մենք ունենք մարզի համաչափ զարգացման խնդիր և դա կփորձենք լուծել»:
Լոռու մարզպետ Անդրեյ Ղուկասյանը, որը մինչև նոր նշանակումը զբաղեցնում էր մարզպետի տեղակալի պաշտոնը, նշեց, որ իր նպատակներից է մարզում զբոսաշրջությունը զարգացնելը․ - «Մարզը ունի զբոսաշրջության ահռելի պոտենցիալ, և մենք օգտագործում ենք ընդամենը մի չնչին մասը: Պետք է տարվեն մեծ աշխատանքներ, որպեսզի այդ պրոցեսը տեղի ունենա, և Լոռու մարզը մեր զբոսաշրջության քարտեզում գրավի շատ պատվավոր տեղ»:
Մայիսին տեղի ունեցած հեղափոխությունից հետո Հայաստանի մարզերից վեցը ղեկավարում էին Դաշնակցական և «Ծառուկյան» դաշինքը ներկայացնող մարզպետներ։ Նախորդ շաբաթ, սակայն, վարչապետ Նիկոլ Փաշինյանի առաջակությամբ կառավարությունը նրանց ազատեց աշխատանքից: Պատճառը Դաշնակցության և «Ծառուկյան» դաշինքի օժանդակությամբ խորհրդարանում ընդունված օրենքի նախագիծն էր, որը փողոց դուրս բերեց տասնյակ հազարավոր մարդկանց։
Առայժմ թափուր են մնում Սյունիքի, Արագածոտնի և Արմավիրի մարզպետի պաշտոնները: Կառավարության ասյօրվա նիստում այդ հարցին անդրադարձ չեղավ։
Տարածքային կառավարման նախարար Արայիկ Պապիկյանը լրագրողների հետ զրույցում ասաց, որ թեկնածուներ առայժմ չկան․ - «Օրենքով կաշկանդված չենք, ժամկետով կաշկանդված չենք: Պիտի լավագույն ընտրությունը լինի, այնպես որ, շտապելու ոչինչ չկա, մանավանդ որ փոխմարզպետ պաշտոնակատար ունենք, աշխատանքները որպես այդպիսին շարունակվում են»:
Այսօր նշանակված երեք մարզպետներն էլ պնդեցին, որ արտահերթ խորհրդարանական ընտրությունների դեպքում վարչական լծակները չեն օգտագործվելու, վարչապետից այս թեմայի վերաբերյալ որևէ հանձնարարական չեն ստացել։
