Երևանի ընդհանուր իրավասության դատարանը այսօր բավարարեց գործարար Սամվել Մայրապետյանին կալանավորելու միջնորդությունը:
Պաշտպանական կողմը «Ազատությանը» հայտնեց, որ պատրաստվում է բողոքարկել դատարանի որոշումը:
Սամվել Մայրապետյանը ձերբակալվել է հոկտեմբերի 6-ին, նրան մեղադրանք է առաջադրվել Քրեական օրենսգրքի 38-311 հոդվածով՝ «կաշառք ստանալուն օժանդակելը»:
Մայրապետյանը գործունեություն է ծավալում շինարարության ոլորտում, «Տոյոտա Երևան» ընկերության նախագահն է, նրան է պատկանում Հ2 հեռուստաընկերությունը:
Հանրության լայն շրջանակներին Սամվել Մայրապետյանը հայտնի դարձավ Հայաստանի երկրորդ նախագահ Ռոբերտ Քոչարյանի օրոք մայրաքաղաքի հայտնի Հյուսիսային պողոտայի կառուցման ժամանակ, երբ տարածքներ ձեռք բերեց այդտեղ:
