Վարչապետ Նիկոլ Փաշինյանի հրաժարականի միջոցով խորհրդարանը ցրելու սցենարը դեռ վերջնական չէ, բայց, ինչպես այսօր պնդեց Փաշինյանը, դեկտեմբերին արտահերթ ընտրություններ տեղի ունենալու են:
Պատասխանելով «Ազատության» հարցին՝ որոշե՞լ է, թե երբ է հրաժարական տալու, Հայաստանի ղեկավարը հայտարարեց, թե հաշվի է առնելու իր հնարավոր հրաժարականի շուրջ հանրային դժգոհությունը: «Եթե իմ որոշումով լիներ, արդեն պիտի տված լինեի, բայց քանի որ հանրության շրջանում շատ բուռն արձագանք կա, այդ սցենարի վրա ևս մեկ անգամ ավելի մանրամասն պետք է մտածենք, բայց դեկտեմբերին պետք է արտահերթ ընտրություններ տեղի ունենան», - ասաց Փաշինյանը:
«Երբ որ մենք խոսում ենք հրաժարական, մենք խոսում ենք այն իրավիճակի մասին, երբ որ զուտ իրավական ընթացակարգերն իրականացնելու համար դե յուրե հրաժարական է տրվում և դե ֆակտո հրաժարական չի տրվում», - ասաց վարչապետը՝ շարունակելով․ - «Էստեղ ինչն է նրբությունը՝ ես ուղղակի հիմա տեսնում եմ, որ շատ մեծ հանրային դժգոհություն կա դրա կապակցությամբ: Ես չեմ ուզում, որ մենք նմանվենք այն իշխանություններին, որ երկար տարիներ հանրությունը պահանջում է հրաժարական տալ, և նրանք համառորեն հրաժարական չեն տալիս, հիմա էլ եթե հանրությունը պահանջում է հրաժարական չտալ, և իշխանություն համառորեն հրաժարական է տալիս: Պետք է էնպես անենք, որ էս իրավիճակը լինի բոլորին հասկանալի՝ իր բոլոր նրբություններով»:
Վարչապետը նշեց, որ ոչ մի գործողություն չպետք է անի ժողովրդի իշխանությունը, թեկուզ տեականորեն, վտանգի տակ դնելու համար։
«Իհարկե, քավ լիցի, որևէ գործողություն, ես հասկանում եմ, որ չպետք է անեմ ժողովրդի իշխանությունը թեկուզ տեսականորեն վտանգի տակ դնելու համար, բայց մյուս կողմից՝ մենք պետք է անպայման արտահերթ ընտրություններ անենք, որպեսզի, ի վերջո, էս բարիկադային ռեժիմից անցնենք առօրյա աշխատանքային ռեժիմի», - հայտարարեց Փաշինյանը:
Այդուհանդերձ, վարչապետը չի մանրամասնում՝ ինչպես է պատկերացնում խորհրդարանի ցրումը, եթե հրաժարական չտա:
Այսօր Նիկոլ Փաշինյանը հանդիպելու է Ազգային ժողովում մեծությամբ երկրորդ խմբակցության ղեկավար, «Բարգավաճ Հայաստան»-ի առաջնորդ Գագիկ Ծառուկյանի հետ:
«Մենք պատրաստվում ենք անցկացնել արտահերթ խորհրդարանական ընտրություններ դեկտեմբերին: Բայց ես կարծում եմ, որ Փարիզում իմ գտնվելու ընթացքում որոշակի իրադարձություններ են տեղի ունեցել, որոնք անպայման մենք հաշվի կառնենք, և, մասնավորապես, «Բարգավաճ Հայաստան» կուսակցության ղեկավար Գագիկ Ծառուկյանի հարցազրույցը, և ըստ էության պաշտպանեց դեկտեմբերին արտահերթ ընտրություններ անցկացնելու գաղափարը: Ես պատրաստվում եմ այդ հարցազրույցի արդյունքներով նաև հանդիպել պարոն Ծառուկյանի հետ, որպեսզի մենք իրավիճակը և հանգուցալուծման սցենարների վերաբերյալ պատկերացումները քննարկենք», - ասաց Նիկոլ Փաշինյանը՝ հավելելով․ - «Կարծում եմ, Դաշնակցության հետ նույնպես կլինի հանդիպում, որովհետև նաև Փարիզում գտնվելու ընթացքում որոշակի շփումներ են եղել նաև Դաշնակցության սփյուռքի կառույցների ներկայացուցիչների հետ, և կարծում եմ, որ կլինի քննարկում»:
«Ազատության» դիտարկմանը՝ Գագիկ Ծառուկյանը դժգոհում էր, որ իր ղեկավարած ուժին հակահեղափոխական են անվանել, վարչապետն արձագանքեց․ - «Էսօր մենք հանդիպելու ենք, և կարծում եմ, որ խոսակցությունը կլինի պաշտոնական և կառուցողական: Երեկ մենք հանդիպել ենք, քննարկել ենք և արձանագրել ենք, որ կա ըմբռնում ընդհանուր և այդ ըմբռնման հիման վրա առաջ կգնանք, ոչ մի պրոբլեմ չկա»:
Վարչապետը քննարկելի է համարում պատգամավորների մանդատները վայր դնելու ճանապարհով արտահերթ ընտրությունների անցկացումը:
«Խորհրդարանն արդեն դե ֆակտո լուծարված է, մնում է դե յուրե», ասում էր Փաշինյանը՝ ընդգծելով, որ իրենց կոճակ սեղմողներ պետք չեն:
Նիկոլ Փաշինյանը նախագահին է հանդիպել Փարիզում, բայց չասաց՝ արդյո՞ք Արմեն Սարգսյանը մտադիր է ստորագրել Ազգային ժողովի կանոնակարգ օրենքում վիճահարույց փոփոխությունները, նախագահը Հայաստան է վերադառնալու վաղը:
Դիտարկմանը, որ եթե ամեն դեպքում խորհրդարանը լուծարելու համար Փաշինյանը հրաժարական տա, իսկ Հանրապետականն էլ որոշի սեփական թեկնածու առաջադրել ու արագ նոր վարչապետ ընտրեն, վարչապետն այսպես արձագանքեց. - «Ֆանտաստիկայի ժանրից է, որովհետև ժողովուրդը և մենք, որևէ մեկին նման հնարավորություն չենք տա, որովհետև ասում եմ, որ եթե որևէ մեկը որոշել է, որ պետք է մտնի հայ ժողովրդին խանգարողի և հայ ժողովրդի համար պրոբլեմներ ստեղծողի դերակատարման մեջ՝ ժողովուրդն այդ պրոբլեմը լիկվիդացնելու ձևը կգտնի: Սովորաբար, խոսում ենք պատմության աղբանոցի մասին, որը կարծում եմ ավելի վտանգավոր է քան «Սանիտեկ»-ի աղբանոցները. «Սանիտեկ»-ի աղբանոցներից կարելի է դուրս գալ, իսկ պատմության աղբանոցից ելք չկա»:
Վարչապետ Փաշինյանն այսօր կոշտ քննադատության ենթարկեց Եվրոպայի խորհրդի Խորհրդարանական վեհաժողովում (ԵԽԽՎ) Հայաստանի պատվիրակության գործունեությունը: Հանրապետական կուսակցությունն այստեղ ներկայացնում են Արփինե Հովհաննիսյանը, Սամվել Ֆարմանյանը, Կարինե Աճեմյանը և Ռուստամ Մախմուդյանը ու պարբերաբար հայտնում են, թե ժողովրդավարական ազատությունների հարցը բարձրաձայնում են այս կառույցում:
«Ես ինչքան շփվում եմ միջազգային ներկայացուցիչների հետ, ես առայժմ ոչ մի դժգոհություն չեմ լսել, երբ որ կլսեմ, կարծում եմ, մենք բավարար փաստարկներ կունենանք էդ ամեն ինչին հակադարձելու: Եվ ես կարծում եմ, որ մեր Ազգային ժողովը, եթե ոմանց մեղադրում էին ԵԽԽՎ-ում խավիարային դիվանագիտություն իրականացնելու համար, կարծում եմ, իրենք նույնպես պետք է նայեն իրենց և դադարեն ստեր տարածել Հայաստանի Հանրապետությունում ստեղծված իրավիճակի մասին», - ասաց վարչապետը՝ շարունակելով. - «Ես ասեմ, որ Հանրապետական պատգամավորներին և ԵԽԽՎ-ում մեր պատվիրակությանն ամենևին պատիվ չի բերում, որ նրանք առաջին օրից սկսած փորձում են Հայաստանում իրադարձություններն այլ լույսի ներքո ներկայացնել, և սա ևս մի փաստարկ է, որ պետք է արտահերթ խորհրդարանական ընտրություններ տեղի ունենան»։
Ըստ Փաշինյանի, ԵԽԽՎ-ում հայկական պատվիրակությունն, ըստ էության, ներկայացնում է նախկին կոռուպցիոն համակարգը։
«ԵԽԽՎ-ում մեր պատվիրակությունը ըստ էության, ոչ մեկին չի ներկայացնում, ներկայացնում է նախկին կոռուպցիոն համակարգը, և նրանց ասածներին ընդհանրապես լուրջ վերաբերվել պետք չի: Համենայն դեպս համազեկուցողները, երբ որ կժամանեն Հայաստանի Հանրապետություն, մենք, կարծում ենք, որ իրենց շատ բան ասելու անհրաժեշտություն չենք ունենա: Կասենք՝ դուրս եկեք փողոց, շփվեք մարդկանց հետ, շփվեք լրագրողների հետ, շփվեք հասարակական կազմակերպությունների հետ: Մենք չենք պատրաստվում որևէ հակափաստարկ բերել, իրենք թող գան, մոնիթորինգ պետք է անեն, թող գան մոնիթորինգ անեն, ամեն ինչ Հայաստանի Հանրապետությունում»:
