Պակիստանի նախկին վարչապետ Նավազ Շարիֆը կվերադառնա երկիր հուլիսի 13-ին: Այս մասին հայտարարել է նախկին վարչապետի դուստրը:
«Մենք որոշել ենք վերադառնալ [հուլիսի 13-ին]», - երեկ հայտարարել է Մարիամ Նավազը:
Նա հավելել է, որ փաստաբանները ուսումնասիրում են իրենց գործը բոլոր իրավական տեսանկյուններից:
Շարիֆը և դուստրը այժմ Լոնդոնում են, որտեղ նախկին վարչապետի կինը բուժվում է քաղցկեղից:
Անցյալ շաբաթ Ազգային հաշվետվողականության բյուրոյի դատարանը(National Accountability Bureau) Շարիֆին կոռուպցիայի գործով դատապարտեց 10 տարվա ազատազրկման: Շարիֆի դուստրը, ով համարվում էր նրա քաղաքական ժառանգը, նույն գործի շրջանակներում դատապարտվեց 7 տարվա ազատազրկման:
Մուշահիդուլա Խանը, Շարիֆի «Պակիստանի մահմեդական Լիգա-Նավազ» կուսակցության սենատորը հայտարարել է, որ նախկին վարչապետը պատրաստվում է բողոքարկել դատարանի որոշումը:
Ակնկալվում է, որ իրավապահները կձերբակալեն Նավազ Շարիֆին և դստերը հենց նրանք վայրէջք կատարեն Պակիստանում:
