Ինչպես «Ազատությանն» այսօր տեղեկացրեց ՀՀ նախագահի աշխատակազմի գործերի կառավարչի պաշտոնից օրեր առաջ ազատված Վարուժան Գրիգորյանը, վարչապետի պաշտոնից հրաժարական ներկայացնելուց հետո Սերժ Սարգսյանը շարունակում է բնակվել կառավարական նույն առանձնատանը, որը նրան, որպես նախկին նախագահի, անհատույց, սեփականության իրավունքով տրամադրվել էր Կառավարության կողմից:
«Ամսի 4-ի դրությամբ ինքը ապրում էր էնտեղ», - ասաց Գրիգորյանը:
Մարտի՝ 19-ին Սերժ Սարգսյանի գլխավորությամբ Կառավարության միակ նիստին, նախկին նախագահը իր վարչապետության դեմ մեկնարկած բողոքի միջոցառումներին զուգահեռ հայտարարեց, որ հրաժարվում է պետական առանձնատան նկատմամբ սեփականության իրավունքից․ - «Շատ շնորհակալ եմ այդպիսի որոշման համար: Բայց այսօր ես եմ Կառավարության ղեկավարը և ես եմ նստած նիստը անցկացնողի բազկաթոռին: Սա այլ իրավիճակ է, ուստի ես որոշում եմ կայացրել հրաժարվել այդ տան նկատմամբ սեփականության իրավունքից հենց առաջին նիստի ժամանակ, որը ես կանցկացնեմ: Այսինքն այսօր: Պարոն Գևորգյան, խնդրում եմ հանձնարարել համապատասխան մարդկանց, որպեսզի որոշման նախագիծ պատրաստեն, որպեսզի հաջորդ նիստի ժամանակ մենք ընդունենք: Հիմա Հանրապետության երրորդ նախագահի բնակարանային խնդիրը լուծելու պահը չէ»:
Այդուհանդերձ նոր վարչապետի ընտրությունից մեկ օր առաջ՝ այսօր, կառավարությունից փոխանցեցին, որ մինչև այժմ գործադիրը որոշում չի ընդունել Սերժ Սարգսյանին՝ «կառավարական դաչայում» գտնվող առանձնատան սեփականության իրավունքից զրկելու վերաբերյալ:
«Պաշտոնաթող նախագահը շարունակում է բնակվել նշված հասցեում՝ մինչև համապատասխան որոշման ընդունումը», - նշվում է Կառավարության լրատվական ծառայության պատասխանում:
Հրաժարվելով կառավարական առանձնատան սեփականության իրավունքից՝ Սերժ Սարգսյանը գործադիրի անդամներին ասել էր․ - «Այդ հարցին կարող եք անդրադառնալ, երբ այս բազկաթոռին նստած կլինի ուրիշ վարչապետ»:
Արդյո՞ք վաղը վարչապետ ընտրվելու դեպքում Նիկոլ Փաշինյանի գլխավորած գործադիրը կընդունի որոշում զրկելով Սերժ Սարգսյանին կառավարական առանձնատան սեփականության իրավունքից: Այս հարցին ի պատասխան Փաշինյանի քաղաքական թիմի անդամ Տիգրան Ավինյանն ասաց․ - «Մենք նման հարց դեռևս չենք քննարկել, բայց ես ինձ վրա կվերցնեմ այդ պատասխանատվությունը և կասեմ՝ այո, պատրաստվում է: Այդ առանձնատունը, որը պատկանել է Հայաստանի բոլոր իշխանությունների ժամանակ առաջին դեմքերին, այսինքն՝ օգտագործվել է, շահագործվել է առաջին դեմքերի կողմից, նույն ձևով շարունակելու է իր գործառույթը: Այդ շենքը չի կարող լինել որևէ մեկի սեփականությունը, դա լինելու է Հայաստանի Հանրապետության սեփականությունը»:
Վարչապետ ընտրվելու պարագայում արդյոք ինքը՝ Փաշինյանը, կտեղափոխվի կառավարական որևէ առանձնատուն: Այս հարցի կապակցությամբ, ընդդիմադիր շարժման ներկայացուցչի փոխանցմամբ, դեռ որոշում չկա:
Խորհրդային շրջանից երկրի գործող ղեկավարության համար նախատեսված՝ Ձորափի փողոցի կառավարական առանձնատների հատվածում, Սերժ Սարգսյանին անհատույց հատկացված առանձնատունը հարակից շինություններով ու սպասարկման 1,5 հեկտար տարածքով, ինչպես և նախկինում գտնվում է «Կոնդի առանձնատների տնտեսություն» ՊՈԱԿ-ի հաշվեկշռում, տեղեկացրին կառավարությունից:
