«Հանրապետական կուսակցությունը երկու խնդիր ունի․ առաջին, արդյո՞ք էդ որոշումը, որ ինքը կայացնում է, բխում է Սահմանադրությունից և օրենքներից, արդյո՞ք դա օրինակն է, և երկրորդ, այդ որոշումը որքանո՞վ է բխում հանրության հիմնական հատվածի շահերից: Այս երկու հարցերի պատասխանը պետք է հնչեցվի: Եթե դա հնչեցվելու պարագայում մի տասը հազար հոգի չի համաձայնվում, նո՞ւ ի շտո, հետո՞ ինչ․․․ Դա կարող է լինել, չէ՞», - ասաց Խոսրով Հարությունյանը:
ՀՀԿ փոխնախագահ Գալուստ Սահակյան․ - «Էն, ինչը Հանրապետականը որոշում ա ընդունում, ուզում է տասնյակ հազարավոր միտինգներ անեն, իմ կարծիքը կմնա էն, ինչը որ որոշել ենք մենք»:
Հանրապետականները պնդում են, որ վարչապետի թեկնածուի հարցը չեն քննարկել, այդուհանդերձ ընդդիմադիր «Ելք»-ից կարծիք է հնչում՝ իշխող ուժը, Սերժ Սարգսյանից բացի, վարչապետի այլ թեկնածու չունի:
«Քաղաքացիական պայմանագիր» կուսակցության ղեկավար անդամներից Նիկոլ Փաշինյանի խոսքով, Սարգսյանի հետագա պաշտոնավարումը կարելի է կանխել միայն ժողովրդի ճնշման ներքո: «Ելք» դաշինքում այժմ չեն կարողանում համաձայնության գալ պայքարի տարբերակների շուրջ:
«Ազատության» հետ զրույցում Փաշինյանը չէր բացառել, որ փողոց դուրս գալու վերաբերյալ միասնական որոշում չլինելու դեպքում, կուսակցություններից մեկը կամ երկուսը կարող են որոշել փողոցային պայքար ծավալել:
Իշխանական ուժի պատգամավորները համոզված են՝ ընդդիմությունը փողոցային պայքար սկսելու ռեսուրս չունի։
«Չեմ գտնում, որ մենք ունենք էդպես քարիզմատիկ մի ընդդիմություն, որը կկարողանա շատ մարդ հավաքել», - իր կարծիքն ասաց Գալուստ Սահակյանը:
Այս օրերին ընդդիմադիրները ՀՀԿ-ականներին հիշեցնում են Սերժ Սարգսյանի՝ դեռ 2014 թվականի հավաստիացումները, թե չի հավակնելու ո՛չ նախագահի, ո՛չ էլ վարչապետի պաշտոնին:
Ազգային ժողովի նախկին նախագահ, նախկին վարչապետ Խոսրով Հարությունյանը զարմացած է՝ հետո՞ ինչ, որ ասել է․․․ Նրա խոսքով, երբ ինքը կշեռքի նժարին է դնում նախագահի ասածն ու երկրի առաջ ծառացած խնդիրները, վերջինն իր համար միանշանակ ավելի ծանրակշիռ է թվում։ Հարությունյանը կարծում է, որ հանրությունն էլ է այդպես մտածում։
Նա շեշտում էր անվտանգության ու արտաքին քաղաքական խնդիրները՝ չհիշատակելով, օրինակ, արտագաղթը: Մամուլի հրապարակումների համաձայն, Սարգսյանի նախագահության տարիներին Հայաստանից հեռացել է ավելի քան 370 հազար մարդ:
Խոսրով Հարությունյանն ասաց․ - «Մարդը ինչ-որ մի բան ասեց, հետևաբար իր ասածին գերի դառնա՞, թե՞ էսօր, այդուհանդերձ, վաղը չէ մյուս օրը իմ ընտանիքի անվտանգությունն ա ինձ համար կարևոր՝ ում վստահեմ էդ անվտանգությունը: Սրանք են լինելու գերակա խնդիրները»:
Գալուստ Սահակյանն ասաց, որ եթե որոշեն Սերժ Սարգսյանի թեկնածությունն առաջադրել, 2014-ին նախագահի արած հայտարարությունը չի կաշկանդի ՀՀԿ-ին․ - «Յուրաքանչյուր պետության մեջ բազմաթիվ հայտարարություններ են լինում: Եթե յուրաքանչյուր պետության բազմաթիվ հայտարարությունները ի նպաստ դրվեր մարդկության ճանապարհի վրա, մենք բավականին․․․ ինչ ասեմ, էնպիսի մոլորակ կունենայինք աշխարհի, որ որևէ մեկը չէր կարող ճանաչել: Քաղաքական հայտարարությունն ուրիշ է, պայմանագիր կնքելն ուրիշ է․․․ Նույնիսկ պայմանագիր ես կնքում, հետո պայմանագրից հետ ես վերադառնում: Ես էդտեղ որևէ բան չեմ տեսնում որևէ մեկին պատասխանելու համար»:
Գալուստ Սահակյանի խոսքով, վարչապետի թեկնածուի հարց Հանրապետականը կքննարկի ապրիլի 14 կամ 15-ին:
Հիշեցնեմ, վարչապետի թեկնածու առաջադրելու վերջնաժամկետն ապրիլի 16-ն է: Երկրի թիվ մեկ պաշտոնյայի ընտրության քննարկումները, ըստ ամենայնի, կմեկնարկեն ապրիլի 17-ին: