Սիրիայի ապստամբների վերահսկողության տակ գտնվող արևելյան Գուտայի շրջանում Ռուսաստանի հայտարարած 5-ժամյա «մարդասիրական դադարի» առաջին օրվա ընթացքում ռմբահարումները չեն դադարել:
Կողմերը միմյանց են մեղադրում՝ հրադադար խախտելու համար:
ՄԱԿ-ը, Կարմիր Խաչը հայտարարել են, որ հնարավոր չէ սիրիացիներին օգնություն հասցնել այդ պայմաններում:
Նշենք, որ Ռուսաստանի պաշտպանության նախարար Սերգեյ Շոյգուն հայտարարել էր, որ Ռուսաստանի նախագահ Վլադիմիր Պուտինը «մարդասիրական դադար» է հայտարարել Արևելյան Գուտայում, որը պետք է ուժի մեջ մտնի փետրվարի 27-ին:
Ավելի վաղ ՄԱԿ-ի Անվտանգության խորհուրդն էր բանաձև ընդունել՝ պահանջելով անհապաղ հրադադար սահմանել Սիրիայում, որը պետք է տևի մեկ ամիս՝ հումանիտար օգնություն հասցնելու և վիրավորներին տարհանելու հնարավորության համար:
Բանաձևը հաջորդել է Արևելյան Գուտայում օրեր տևած ռմբակոծություններին, որոնց հետևանքով, ըստ իրավապաշտպանների, ավելի քան 500 մարդ է զոհվել: Օդային հարձակումներին մասնակցում է ռուսական օդուժը, որն աջակցում է սիրիական կառավարական ուժերին:
