Թվիթեր սոցիալական ցանցը հայտարարել է, որ 2016 թվականի ԱՄՆ նախագահական ընտրությունների արդյունքների վրա ազդելու՝ Ռուսաստանի ջանքերը ավելի մեծ ազդեցություն են ունեցել, քան ընկերությունում ավելի վաղ կարծում էին: Հունվարի 19-ին հրապարակված հաղորդագրության մեջ ընկերությունը նշում է, որ ավելի քան 677,775 ամերիկացիներ հետևել կամ «հավանել» են Սանկտ Պետերբուրգում գրանցված «Ինտերնետային հետազոտական գործակալության» հետ առնչվող օգտահաշիվներ և գրառումներ: Այսպիսով, ըստ Թվիթերի նոր բացահայտումների, որպես «թրոլների ֆերմա» հայտնի ռուսաստանյան այս կառույցի հետ կապ ունեցող օգտահաշիվների թիվն աճել է 1,062-ով՝ հասնելով 3,814-ի:
Ընկերությունը նշել է, որ 2016-ի նոյեմբերին կայացած ընտրություններին նախորդած 10 շաբաթների ընթացքում ռուսաստանյան օգտահաշիվները հրապարակել են 175,993 գրառում, որոց շուրջ 8.4 տոկոսն առնչվել են ընտրություններին:
«Այսօրինակ գործունեությունը մարտահրավեր է ժողովրդական հասարակության համար ամենուրեք, և մենք պարտավորվում ենք շարունակել աշխատանքը այս կարևորագույն խնդրի ուղղությամբ», - ասված է ընկերության հաղորդագրությունում:
Թվիթերը նաև նույնականացրել է 13,512 ավտոմատացված օգտահաշիվ, որոնք «կապ են ունեցել Ռուսաստանի հետ» և ակտիվորեն գրառումներ են կատարել ընտրությունների ընթացքում: Այսպիսով, նման օգտահաշիվների ընդհանուր թիվը հասել է 50,258-ի: Սոցցանցը այս մասին տեղեկացրել է ԱՄՆ Կոնգրեսին և շարունակելու է այս ուղղությամբ ուսումնասիրությունները: