Ռուսաստանի արտգործնախարար Սերգեյ Լավրովի խոսքով, ներկայումս բազմաթիվ երկրներ ցանկանում են ԵԱՏՄ-ի հետ ազատ առևտրի գոտու ստեղծման շուրջ համաձայնագիր կնքել:
Ռուսաստանյան ТАСС գործակալության հաղորդմամբ՝ Լավրովն այդ մասին հայտարարել է այսօր՝ Բաքվի դիվանագիտական ակադեմիայում ունեցած ելույթի ժամանակ:
«Մեզ մոտ ԵԱՏՄ-ի հետ ազատ առևտրի գոտու ստեղծման շուրջ համաձայնագիր կնքել ցանկացող երկրների հերթ է գոյացել»,- ասել է ՌԴ արտգործնախարարը, միևնույն ժամանակ նշելով, թե Եվրամիությունն ինքն իրեն կաշկանդում է ԵԱՏՄ-ի հետ կապեր հաստատելու հարցում: «Նրանք պատժում են իրենց, մենք նույնպես դրանից չենք շահում: Կարևոր է՝ չստեղծել փակ ակումբներ և փորձել մրցակցել ուրիշների հետ: Դա կհանգեցնի առևտրային հարաբերությունների հատվածականության»,- հավելել է Սերգեյ Լավրովը:
Վերջինս երեկ պաշտոնական այցով մեկնել էր Բաքու։ Նրա այցը նվիրված է Ադրբեջանի և Ռուսատանի միջև դիվանագիտական հարաբերությունների հաստատման 25-ամյակին։ Բաքվում Ռուսաստանի արտգործնախարարի հանդիպումների օրակարգում են երկկողմ հարաբերություններին վերաբերող հարցեր, համագործակցությունը միջազգային ասպարեզում, գլխավորը, սակայն, ղարաբաղյան խնդրի շուրջ բանակցություններն են։
Այսօր ՌԴ արտգործնախարարը ժամանում է Երևան:
