Առայժմ անհայտ է՝ արդյոք ռուսաստանյան նավթային հսկա «Ռոսնեֆտ»-ի ղեկավար Իգոր Սեչինը այսօր կներկայանա դատարան՝ տնտեսական զարգացման նախկին նախարար Ալեքսեյ Ուլյուկաևի աղմկահարույց գործով հարցաքննության:
Դատարանը Սեչինին հարցաքննության է կանչում արդեն երկրորդ անգամ, նախորդ անգամ նա չէր ներկայացել:
Իգոր Սեչինը երկար տարիներ զբաղեցնում էր Ռուսաստանի նախագահ Վլադիմիր Պուտինի աշխատակազմի ղեկավարի տեղակալի պաշտոնը:
61-ամյա Ալեքսեյ Ուլյուկաևը, ով անցած դարի կեսերից սկսած կոռուպցիոն մեղադրանքով Ռուսաստանում ձերբակալված ամենաբարձրաստիճան պաշտոնյան է, մեղադրվում է խոշոր չափի կաշառք վերցնելու մեջ: Ըստ մեղադրանքի, նա 2 միլիոն ամերիկյան դոլար է ստացել՝ հաստատելու համար «Բաշնեֆտ»-ի արժեթղթերի վերահսկիչ փաթեթը կառավարությունից «Ռոսնեֆտ»-ին փոխանցելու գործարքը: Մեղադրանքը հաստատվելու դեպքում նախկին նախարարին 15 տարի ազատազրկում է սպառնում:
Ուլյուկաևը, հիշեցնենք, ձերբակալվել է ուղիղ մեկ տարի առաջ:
