Ուկրաինական դատարանը այսօր շարունակում է Վրաստանի նախկին նախագահ, Օդեսայի նախկին նահանգապետ Միխեիլ Սաակաշվիլիի գործի քննությունը, որով նա մեղադրվում է Ուկրաինայի սահմանը ապօրինի խախտելու մեջ:
Վարչական այդ իրավախախտումը նախատեսում է մինչև 325 դոլար տուգանք:
Ինքը Սաակաշվիլին չի ներկայացել, դատարանում նրա շահերը ներկայացնում են փաստաբանները:
Վրաց քաղաքական գործչի փաստաբան Մարկիյան Գալաբան հայտարարել է, որ ուկրաինական իշխանությունները դատարանի որոշման հիման վրա կարող են Սաակաշվիլիին` որպես քաղաքացիություն չունեցող անձի, որը վարչական իրավախախտում է թույլ տվել, երկրից արտաքսելու մեխանիզմ մշակել:
Ուկրաինայի քաղաքացիությունից զրկված Սաակաշվիլին հարյուրավոր համակիրների օգնությամբ սեպտեմբերի 10-ի երեկոյան մուտք է գործել Ուկրաինա՝ հատելով Լեհաստանի հետ երկրի սահմանը:
Սաակաշվիլին ապօրինի է համարում իրեն Ուկրաինայի քաղաքացիությունից զրկելու՝ նախագահ Պետրո Պորոշենկոյի որոշումը և պնդում է, թե ամեն կերպ հասնելու է Կիև ու դատարանով է այն վերականգնելու:
Ավելի վաղ` 2015 թվականին, նախկին նախագահը զրկվել էր Վրաստանի քաղաքացիությունից, երբ Ուկրաինայի քաղաքացիություն էր ընդունել, որպեսզի կարողանա ստանձնել Օդեսայի նահանգապետի պաշտոնը իր այժմ արդեն նախկին դաշնակից Պորոշենկոյի հրավերով:
