Միացյալ Նահանգների գերագույն դատարանը երեկվա որոշմամբ նախագահ Դոնալդ Թրամփի վարչակազմին ևս մեկ շաբաթ ժամանակ է տրամադրել՝ մեծամասամբ մահմեդական բնակչություն ունեցող 6 երկրների քաղաքացիների մուտքը ԱՄՆ ժամանակավորապես սահմանափակելու վերաբերյալ հրամանագրի հիմնավորումները ներկայացնելու համար:
Իրանի, Լիբիայի, Սիրիայի, Սոմալիի, Սուդանի ու Եմենի նկատմամբ միգրացիոն սահմանափակումների հրամանագիրը Թրամփը ստորագրել էր մարտի սկզբին, սակայն այն, ինչպես և նախորդ՝ հունվարի վերջին ստորագրված հրամանագիրը, որով այդ երկրների թվում ընդգրկված էր նաև Իրաքը, արգելափակվել է նահանգային դատարանի կողմից անորոշ ժամկետով՝ խտրական համարվելով:
Թրամփի վարչակազմը Գերագույն դատարանին խնդրել է չեղյալ համարել այդ վճիռները և վերականգնել միգրացիոն սահմանափակումները: Վարչակազմի խնդրանքը բավարարելու համար պահանջվում է Գերագույն դատարանի 9 դատավորներից առնվազն 5-ի համաձայնությունը:
