Ազգային ժողովի ընտրություններից մեկ օր առաջ շուրջ չորս ժամով արգելափակվել էին «Թիվթեր» միկրոբլոգային հարթակի հայկական սեգմենտի մի շարք առանցքային օգտատերեր:
Փակվել էին, մասնավորապես, «Հետք» պարբերականի, «Սիվիլնեթ» TV-ի, Մեդիա նախաձեռնությունների կենտրոնի Media.am կայքի խմբագիր Գեղամ Վարդանյանի և «Գլոբալիզացիայի և տարածաշրջանային կենտրոնի» ղեկավար Ստեփան Գրիգորյանի հաշվեհամարները: Կեսգիշերին մոտ դրանք վերականգնվեցին:
«Ընտրությունների ամենաթեժ պրոցեսում թվիթերյան հաշվից զրկվելն անսովոր է ու անդուր: Ես քվեարկության օրը ու հետընտրական պրոցեսների ժամանակ ակտիվ օգտագործում եմ Թվիթերը տեղեկատվություն փոխանցելու ու քննարկումների համար», - «Ազատությանը» տված գրավոր մեկնաբանությունում նշել է Գեղամ Վարդանյանը: - «Բարեբախտաբար ընկերների օգնությամբ, խորհուրդներով ու աջակցությամբ հնարավոր եղավ ապաարգելափակել հաշիվները», - հավելել է նա:
Ուշագրավ է, որ արգելափակումը տեղի էր ունեցել այն բանից հետո, երբ ռուսական անուն-ազգանուններով թվիթերյան բազմաթիվ օգտատերեր (հնարավոր է՝ բոտեր) սկսել էին ՍՊԱՄ գրառումներ կատարել հայաստանյան ընտրությունները համակարգելու նպատակով օգտագործվող #armvote17 հեշթեգով՝ տարածելով կեղծ նամակ ԱՄՆ ՄԶԳ ղեկավարի անունից, իբրև թե ուղղված հայաստանյան հասարակական կազմակերպություններին և կոչ անելով աջակցել ընդդիմությանը: Թվիթերի հայկական սեգմենտի օգտատերերի դիտարկումներով՝ վերոհիշյալ հայ օգտատերերի հետ միաժամանակ արգելափակվել էին #armvote17 հեշթեգում ակտիվություն դրսևորած վերոհիշյալ ՍՊԱՄ անող օգտատերերը:
Գեղամ Վարդանյանը հիշում է, որ օրվա ընթացքում դիտարկել ու գրառում էր արել #armvote17 հեշթեգի վրա ենթադրյալ ռուսական ծագմամբ թրոլների/բոտերի գրոհի մասին:
«Կարծում եմ՝ արգելափակումը կապ ունի այդ թրոլների/բոտերի հետ, սակայն իհարկե ասածս պնդելու համար պետք կլինի Թվիթերից ունենալ այն օգտատերերի ցանկը, ովքեր «ռեփորթ» էին արել մեր թվիթերյան հաշիվները: Ու կատարվածի նպատակն էլ ինձ համար դեռ անհասկանալի է», - մեկնաբանում է Media.am կայքի խմբագիրը: