Այսօր Ժնևում նախատեսված են բանակցություններ Սիրիայի հարցով: Կիրակի երեկոյան Reuters լրատվական գործակալությունը հաղորդեց, որ Ժնև են ժամանել Սիրիական ընդդիմության բանակցությունների գծով բարձրագույն կոմիտեի ներկայացուցիչները:
Կոմիտեի պաշտոնական ներկայացուցիչ Սալիմ ալ-Մուսլադը, ժամանելով Ժնև, հայտարարել է, որ մտադիր են նախատեսվող բանակցություններում շատ արագ հասնել հաջողությունների:
«Մենք հույս ունենք, որ կարող ենք հանգել համաձայնության շատ արագ, քանի որ մեր ժողովուրդը սպասում է, և մենք ուզում ենք տեսնել այս արյունահեղության վերջը Սիրիայում»,- նշել է ալ-Մուսլադը:
«Մենք եկել ենք այստեղ, որպեսզի ներկայացնենք մեր ժողովրդի դիրքորոշումը: Մենք քաղաքական որոշումներ ենք փնտրում բանակցությունների և ոչ թե ռազմական գործողությունների միջոցով»,- ասել է Սիրիական ընդդիմության բանակցությունների գծով բարձրագույն կոմիտեի պաշտոնական ներկայացուցիչը:
Բանակցությունները Սիրիայի ընդդիմության և կառավարության ներկայացուցիչների միջև Ժնևում նախատեսված են միջնորդավորված կերպով, կողմերի տեսակետները պետք է փոխանցի ՄԱԿ-ի գլխավոր քարտուղարի հատուկ բանագնաց Ստաֆան դե Միստուրան:
Սիրիայի հարցով բանակցություններին ընդառաջ՝ երեկ Փարիզում հանդիպել են ԱՄՆ-ի, Գերմանիայի, Ֆրանսիայի, Իտալիայի և Մեծ Բրիտանիայի արտաքին քաղաքական գերատեսչությունների ղեկավարները:
Միացյալ Նահանգների պետքարտուղար Ջոն Քերրին հայտարարել է. - «Մենք հաստատակամորեն աջակցում ենք ՄԱԿ-ի ջանքերին և ակնկալում ենք բանակցությունների շարունակություն Ժնևում, երկուշաբթի օրը»:
Քերրին ասել է, որ նախօրեին Սիրիայի արտգործնախարարության հնչեցրած մեկնաբանությունները պարզորոշ կերպով փորձում են խափանել գործընթացը:
ՄԱԿ-ը հորդորել է Սիրիային 18 ամսում անցկացնել նախագահի ընտրություններ: Սիրիական ընդդիմությունը պնդում է, որ նոր կառավարության կազմում չի կարող ընդգրկվել ներկայիս նախագահ Բաշար ալ-Ասադը: Սիրիայի արտգործնախարար Վալիդ Մուալեմը, մինչդեռ, հայտարարել է՝ ոչ մի հարց նախագահի ընտրությունների կապակցությամբ:
Ֆրանսիայի արտաքին գործերի նախարար Ժան Մարկ-Էրոյի խոսքով՝ Սիրիայի արտաքին գործերի նախարարի մեկնաբանությունները «սադրանք են, չեն համապատասխանում հրադադարի ոգուն»:
Ֆրանսիայի և Միացյալ Նահանգների արտաքին գերատեսչությունների ներկայացուցիչները Ասադի կողմնակիցներին՝ Ռուսաստանին և Իրանին կոչ են արել ջանքեր գործադրել, որպեսզի Դամասկոսը վերջ դնի հրադադարի ռեժիմի խախտումներին:
Հիշեցնենք՝ Սիրիայի հարցով բանակցությունների նախորդ փուլը, որը Ժնևում մեկնարկել էր փետրվարի 1-ին, երկու օր անց ընդհատվեց:
