Երկուշաբթի օրը Բրյուսելում տեղի է ունեցել Եվրամիություն-Հայաստան համագործակցության խորհրդի հերթական նիստը, որտեղ անդրադարձ է կատարվել նաև Լեռնային Ղարաբաղի խնդրին, հակամարտության կարգավորման հեռանկարներին։
Եվրամիության խորհուրդը նախագահող Նիդերլանդների արտաքին գործերի նախարար Բերտ Կունդերսն ասել է, որ Ղարաբաղի հակամարտության խաղաղ կարգավորումը մնում է Եվրամիության առաջնահերթությունը, և որ ստատուս քվոյի պահպանումը անընդունելի է։
Կունդերսն ասել է, որ քննարկվել է նաև սահմանային միջադեպերի վերահսկման մեխանիզմների հարցը՝ նշելով, որ շփման գծի և Հայաստանի սահմանների իրավիճակը լուրջ մտահոգությունների խնդիր է մնում։
Եվրամիությունը նորից զսպվածության կոչ է անում, վերահաստատում է աջակցությունը ԵԱՀԿ-ի Մինսկի խմբի հովանու ներքո ընթացող բանակցություններին։ Եվրամիությունը նաև Հայաստանին և Ադրբեջանին կոչ է անում շարունակել երկխոսությունը, այդ թվում՝ նախագահների մակարդակով։
Եվրամիությունը հաստատել է իր պատրաստակամությունը՝ աջակցելու խաղաղ գործընթացի ջանքերին, ինչպես նաև օգնություն ցուցաբերել հակամարտությունից տուժած շրջանների վերականգնմանը և վերակառուցմանը՝ խաղաղության համաձայնագիրը ձեռք բերվելուց հետո։
Հայաստանի արտգործնախարար Էդվարդ Նալբանդյանը խորհրդի նիստին համառոտ ներկայացրել է Ղարաբաղի հակամարտության խաղաղ կարգավորման բանակցային գործընթացի վերջին զարգացումները, անցյալ տարեվերջին տեղի ունեցած Հայաստանի և Ադրբեջանի նախագահների հանդիպման արդյունքները։
Նա ասել է, որ անցյալ տարի Ադրբեջանի կողմից հրադադարի ռեժիմի խախտումները զգալի աճել են, օգտագործվել է ծանր զինտեխնիկա, ինչը բազմաթիվ մարդկային կորուստների պատճառ է դարձել։
Նալբանդյանն ասել է, թե Մինսկի խմբի համանախագահները հասցեական կոչեր են հղել Ադրբեջանին՝ կոչ անելով զսպվածություն ցուցաբերել, հարգել հրադադարի համաձայնագիրը, հակամարտության խաղաղ կարգավորման հանձնառությունները, չխոչընդոտել բանակցային գործընթացը, համաձայնել շփման գծում և սահմանին հրադադարի խախտումների հետաքննության մեխանիզմի ստեղծմանը։
Նալբանդյանը վստահեցրել է, որ Հայաստանը Մինսկի խմբի համանախագահների հետ շարունակելու է համատեղ ջանքերը՝ ղարաբաղյան հակամարտությունը բացառապես խաղաղ կարգավորելու համար։
Ինչ վերաբերում է Եվրամիություն-Հայաստան հարաբերություններին, որոնք, հիշեցնենք, ըստ էության, վերանայվում էին այն բանից հետո, երբ Հայաստանը հրաժարվեց ստորագրել Եվրամիության հետ Ասոցացման համաձայնագիրը և միացավ Մոսկվայի գլխավորած Եվրասիական տնտեսական միությանը, ապա Բրյուսելում երեկ կայացած նիստին կողմերը ողջունել են Հայաստանի և Եվրամիության միջև նոր համաձայնագրի բանակցությունների մեկնարկը, որոնց սկիզբ դրվեց անցյալ տարի։
Նալբանդյանը համոզմունք է հայտնել, որ նոր համաձայնագիրը փոխշահավետ համագործակցության համար կսահմանի նոր ուղենիշներ։
Կողմերը վերահաստատել են իրենց միասնական հանձնառությունը՝ ամրապնդել ու խորացնել համագործակցությունը բոլոր ոլորտներում, ինչը հնարավոր է համատեղել ԵՏՄ-ին Հայաստանի անդամակցության պարտավորությունների հետ:
Եվրամիություն-Հայաստան համագործակցության խորհրդի նիստի մասին մամուլի հաղորդագրությունում նշված է, որ Եվրամիությունը վերահաստատել է իր աջակցությունը Հայաստանի բարեփոխումներին, այդ թվում՝ վիզային ռեժիմը դյուրացնելու համաձայնագիրը իրականացնելու ուղղությամբ, և Հայաստանին կոչ է արել լավագույնս օգտագործել Եվրամիության կողմից 2014-17 թվականների ընթացքում տրամադրվող 140-170 միլիոն եվրոն՝ ուշադրության տակ պահելով մասնավոր սեկտորի զարգացումը, հանրային կառավարման և արդարադատության ոլորտների բարեփոխումները:
