Լեռնային Ղարաբաղի վերաբերյալ զեկույցներ հրապարակելուց առաջ Եվրախորհրդի խորհրդարանական վեհաժողովին (ԵԽԽՎ) հարկ է խորհրդակցել ԵԱՀԿ-ի հետ: Րոպերեն առաջ Թվիթերում այսպիսի գրառում է կատարել ԵԱՀԿ-ի Մինսկի խմբի ամերիկացի համանախագահ Ջեյմս Ուորլիքը:
Ամերիկացի դիվանագետը նման ձևով արձագանքել է, մասնավորապես, Լեռնային Ղարաբաղին առնչվող վիճահարույց բանաձևի նախագծին ԵԽԽՎ-ի քաղաքական հանձնաժողովի հավանություն տալուն:
Ադրբեջանական «Թրենդ» լրատվական գործակալությանն էլ Ուորլիքն ասել է, որ իրենք կարդացել են ԵԽԽՎ-ի բանաձևի նախագիծը և «կողջունեն ղարաբաղյան բանակցությունների նկատմամբ մոտեցման հարցով ԵԽԽՎ-ի զեկուցողների և շահագրգռված անդամների հետ խորհրդակցություններ անցկացնելու հնարավորությունը»:
«Նաև պետք է նկատի ունենալ, որ կողմերն ընդունում են Մինսկի խմբի ձևաչափը, և համանախագահները կշարունակեն տարածքային ամբողջականության, ինքնորոշման և ուժի չկիրառման սկզբունքների հիման վրա կարգավորման միջնորդական ջանքերը», - «Թրենդ»-ին ասել է ամերիկացի դիվանագետը:
