«Ինտերֆաքս» լրատվական գործակալության փոխանցմամբ, ուրբաթ գիշերը Մոսկվայի կենտրոնում սպանել են ընդդիմադիր քաղաքական գործիչ Բորիս Նեմցովին։
Հաղորդվում է, որ գրոհն իրականացրել է մեկ մարդ, ով դուրս է եկել սպիտակ մեքենայից և թիկունքից չորսից֊յոթ գնդակ է արձակել Նեմցովի վրա այն պահին, երբ ընդդիմադիր գործիչը մի երիտասարդ կնոջ ընկերակցությամբ անցնում էր Բոլշոյ Զամոսկվորեցկի կամրջով։
Սպանությունը տեղի է ունեցել Մոսկվայի ժամանակով ժամը 23:40-ի սահմաններում։
Հաղորդվում է, որ գրոհի ժամանակ Նեմցովին ուղեկցող երիտասարդ կինը Մոսկվա է ժամանել Ուկրաինայից։
Նեմցովի քաղաքական զինակից, ՌԴ նախկին վարչապետ Միխայիլ Կասյանովը ասել է, որ ցնցված է այդ ողբերգական լուրից։
Բորիս Նեմցովը վերջին ամիսների ընթացքում անխնա քննադատել է Ուկրաինայի հարցում նախագահ Վլադիմիր Պուտինի վարած քաղաքականությունը։
Նախագահ Վլադիմիր Պուտինի մամլո խոսնակ Դմիտրի Պեսկովն ասել է, որ Դաշնության ղեկավարին անմիջապես տեղեկացրել են դեպքի մասին։
«Նախագահը խստորեն դատապարտել է դաժան սպանությունը, այն անվանել պատվիրված հանցագործություն, որը սադրանքի նշաններ ունի», - հայտնել է Պեսկովը, ավելացնելով, որ Պուտինը ցավակցություն է հայտնել Նեմցովի ազգականներին և բարեկամներին։
Նեմցովը ծնվել է 1959 թվականի հոկտեմբերի 9-ին Սոչիում։ Նեմցովը Բորիս Ելցինի նախագահության օրոք զբաղեցրել է Նիժնի Նովգորոդի շրջանի նահանգապետի պաշտոնը, ապա տեղափոխվել է մայրաքաղաք և աշխատել որպես վառելիքի ու էներգետիկայի նախարար, իսկ ավելի ուշ նշանակվել է փոխվարչապետ։
1999-2003 թվականներին Բորիս Նեմցովը եղել է ՌԴ Պետական դումայի պատգամավոր։
Նեմցովը երկու տարի առաջ ընտրվել է Յարոսլավլի շրջանի տեղական դումայի պատգամավոր։
Նա «Համերաշխություն» կուսակցության հիմնադիրներից էր, «ՊԱՌՆԱՍ» կուսակցության համանախագահը։ Բացի այդ Նեմցովը Ռուսաստանի ընդդիմության համակարգող խորհրդի անդամ էր։
Ռոսւսաստանցի, ինչպես նաև օտարերկրացի տասնյակ քաղաքական գործիչներ և պաշտոնյաներ դատապարտել են սպանությունը և հույս հայտնել, որ իրավապահները կբացահայտեն հանցագործին։
Նեմցովի ընտանիքի փաստաբանն ասել է, որ վերջին ամիսների ընթացքում ընդդիմադիր գործչին մի քանի անգամ սպառնացել են սպանել։