Գյումրիում Ավետիսյանների 7 հոգանոց ընտանիքի սպանությունների մեջ կասկածվող ռուսաստանցի զինծառայող Վալերի Պերմյակովի դատը կանցկացվի Հայաստանում տեղակայված ռուսական ռազմաբազայի կայազորային դատարանում, հաղորդում է ռուսաստանյան «Ինտերֆաքս» գործակալությունը:
Հղում անելով «իրադրությանը ծանոթ աղբյուրների»՝ գործակալությունը գրում է, որ նման որոշում է ընդունվել Հայաստանում տեղակայված ռազմակայանի կարգավիճակի վերաբերյալ երկկողմ համաձայնագրի հիման վրա, Հայաստանի և Ռուսաստանի իրավապահները նաև համաձայնեցնում են համատեղ մեղադրական եզրակացությունը, որը հիմնվելու է Ռուսաստանի օրենսդրության վրա:
«Քանի որ Ավետիսյանների ընտանիքի սպանության գործով հարուցված քրեական գործը միաժամանակ հետաքննում են թե՛ ռուսական, թե՛ հայկական կողմերը, որոշում է կայացվել ռուսաստանյան քրեական օրենսդրության հիման վրա միասնական մեղադրական եզրակացության համաձայնեցման վերաբերյալ», - ասել է «Ինտերֆաքսի» զրուցակիցը:
Աղբյուրը նաև նշել է, որ դատարանում, սպանության գործին զուգընթաց, քննվելու են Պերմյակովին ներկայացված մյուս մեղադրանքները՝ զենքով դասալքության համար:
«Հայ քննիչների կողմից պատրաստված նյութերը փոխանցվելու են ռուսական կողմին՝ գործին կցվելու համար», - ասել է նա:
