Միսուրի նահանգի Ֆերգյուսոն ավանում հազարավոր բնակիչներ դուրս են եկել փողոցներ, հրկիզել են ավտոմեքենաներ, բնակելի տներ, առևտրի կենտրոններ, հիմնարկներ ու սրճարաններ։
Տեղի են ունեցել լուրջ ընդհարումներ վրդովված ամբոխի և կարգուկանոնը հաստատելու փորձեր կատարող ոստիկանների միջև։ Ավանում քաոս է, թալանվում են մեծ ու փոքր խանութներ, հնչում են կրակոցներ։
Միացյալ Նահանգներում հերթական անգամ հրատապ է դառնում ռասայական խտրականության թեման։ Միսուրիի նահանգապետի որոշմամբ՝ ավանի ոստիկաններին օգնելու համար Ֆերգյուսոն են գործուղվել ազգային գվարդիայի ջոկատները։
Զանգվածային անկարգությունների մասնակիցների գերիշխող մեծամասնությունը սևամորթ բնակիչներն են, նրանց զայրույթը հարուցել է սպիտակամորթ ոստիկան Դարրեն Ուիլսոնին արդարացնելու մասին դատարանի անցած գիշեր կայացրած վճիռը, ինչի մասին հայտնել է դատախազ Բոբ ՄքՔալլոքը։
Այս ողբերգական պատմությունը ամռանն է սկսվել։ Օգոստոսի 9-ին Ֆերգյուսոնում ոստիկանական մեքենայով պարեկություն անող Ուիլսոնը նկատել է փողոցի երթևեկելի մասով քայլող երկու երիտասարդի, նկատողություն է արել, պահանջել է անցնել մայթ, երիտասարդները մոտեցել են մեքենային, սկսել են վիճել, հայհոյել, բաց պատուհանից հարվածներ հասցնել ոստիկանին։
Ուիլսոնը նրանց վրա ատրճանակն է պահել, երիտասարդները փախուստի են դիմել` ամեն մեկը տարբեր ուղղությամբ։
Ոստիկանը հետապնդել է Բրաունին, հասել է նրան և վեց անգամ կրակ արձակել։ Բրաունի ընտանիքը պնդում է, թե երիտասարդը ձեռքերը բարձրացրել է, ցույց տալով, որ այլևս չի դիմադրում, ոստիկանը պնդում է, որ երիտասարդը ագրեսիվ մտադրություն է դրսևորել։
Սևամորթ բնակիչները պնդում են, որ ոստիկանը թիկունքից է կրակել, սակայն դատաբժշկական երեք անկախ զննությունների արդյունքների համաձայն, գնդակները արձակվել են պատանու կրծքին։
Սևամորթի մահվան լուրն անմիջապես ալեկոծել է ավանը, նույն օրը տեղի են ունեցել բախումներ։
Օգոստոսի 15-ին կարևոր տեղաշարժ է եղել` Ֆերգյուսոնի ոստիկանությունը հրապարակել է տեսագրություն, որն ապացուցում է, որ սպանված Բրաունն իր ընկերոջ` Դորիան Ջոնսոնի ուղեկցությամբ, նախքան ոստիկանի հետ ճակատագրական վեճի բռնվելը, ներխուժել են փոքր խանութ, Բրաունը հարվածել է խանութպանին և գողացել է սիգարների արկղ։
Միսուրիի նահանգապետ Ջեյ Նիքսոնը դատապարտել է տեսագրության հրապարակումը, ասելով, որ այն վարկաբեկում է գործում ներքաշված կողմերից մեկին և էլ ավելի է սրում ներհամայնքային լարվածությունը։
Ի դեպ, Բրաունի ընկերոջը` Ջոնսոնին մեղադրանք չի ներկայացվել, քանի որ նա գողություն չի կատարել։
Ոչ միայն Միսուրի նահանգն, այլ ամբողջ Ամերիկան է լարված հետևել դատական գործին։ Երդվյալ ատենակալներն անմեղ են ճանաչել սպիտակամորթ ոստիկանին, և հիմա ավանում, ըստ ոստիկանության պետ Ջոն Բելմարի, ավելի լարված վիճակ է, քան օգոստոսի 9-ին էր։
Զանգվածային ցույցեր են սկսվել Նյու Յորքում, Չիկագոյում, Սիեթլում, Լոս Անջելեսում և մայրաքաղաք Վաշինգտոնում։
Նախագահ Բարաք Օբաման Ֆերգյուսոնի բնակիչներին հորդորել է խաղաղ ցույցերը չվերածել անկարգությունների և միաժամանակ ոստիկաններին զսպվածության կոչ է ուղղել։
«Մենք պարտավոր ենք ընդունել ատենակալների կայացրած որոշումը, կան ամերիկացիներ, ովքեր համաձայն են, կան ամերիկացիներ, ովքեր խիստ հիասթափված են, դա հասկանալի արձագանք է»,- ասել է նախագահը և ավելացրել.-«Մեր երկիրը հիմնված է օրենքի վրա, մենք պետք է ընդունենք դատարանի որոշումը»։
Հիասթափված ամերիկացիներից մեկը սևամորթների ակտիվիստ և իրավապաշտպան Ջեսսի Ջեքսոնն է։
«Ամեն քաղաքում կա իր Ֆերգյուսոնը, իր Մայքլ Բրաունը, մենք ուզում ենք վերջ տալ բռնությանը, դա ոստիկանների բռնությունն է ժողովրդի հանդեպ»,- ասել է իրավապաշտպանը։
Անկարգությունները Ֆերգյուսոնում շարունակվում են։