Ռուսաստանի նախագահ Վլադիմիր Պուտինը երեկ Ղազախստանի և Բելառուսի նախագահներ Նուսուլթան Նազարբաևի և Ալեքսանդր Լուկաշենկոյի հետ հեռախոսազրույցներում արծարծել է նաև Սոչիում վաղը կայանալիք հանդիպումների և Եվրասիական տնտեսական միությանը Հայաստանի անդամակցության թեմաները:
Ղազախստանի նախագահի պաշտոնական կայքէջի փոխանցմամբ՝ Պուտինը և Նազարբաևը ի թիվս այլ հարցերի քննարկել են «կողմերի դիրքորոշումների մերձեցման նպատակով Սոչիում վաղը կայանալիք Ադրբեջանի և Հայաստանի ղեկավարների հանդիպումը»:
Բելառուսի նախագահի պաշտոնական կայքէջի փոխանցմամբ էլ՝ Պուտինը և Լուկաշենկոն քննարկել են Եվրասիական տնտեսական միության շրջանակներում համագործակցությանը և դրա ընդլայնմանը վերաբերող հարցեր, «ընդգծվել է այն դիրքորոշումը, որ դրան Հայաստանի անդամակցությունը չպետք է տեղի ունենա ի վնաս Մաքսային միության շահերի»:
Այս հեռախոսազրույցների մասին Կրեմլի մամուլի ծառայության հաղորդագրությունում տվյալ հարցերի քննարկման վերաբերյալ որևէ հիշատակում չկա:
