У Вэнэсуэле ў нядзелю ўступіў у сілу загад прэзыдэнта Нікаласа Мадуры перавесьці гадзіньнікі на паўгадзіны наперад для эканоміі электрычнасьці. Гэты захад павінен спрыяць скарачэньню спажываньня электрычнасьці ў цёмны час сутак, заявіў міністар навукі і тэхналёгій краіны Хорхэ Арэаза, перадае ВВС.
Паводле яго слоў, менавіта начное выкарыстаньне кандыцыянэраў і асьвятленьня істотна павялічвае спажываньне электрычнасьці. «Проста перавёўшы гадзіньнік на паўгадзіны наперад, мы будзем атрымліваць больш дзённага сьвятла, і цямнець будзе ня так рана», — сказаў міністар.
Вэнэсуэла перажывае глыбокі энэргетычны крызіс, выкліканы працяглай засухай, з-за якой гідраэлектрастанцыі краіны ня могуць працаваць на поўную магутнасьць.
Нягледзячы на тое, што Вэнэсуэла валодае значнымі запасамі нафты, яна атрымлівае вялікую частку сваёй электраэнэргіі ад гідраэлектрастанцый. У красавіку ў краіне пачаліся штодзённыя адключэньні электрычнасьці.
Экспарт нафты складае большую частку бюджэту Вэнэсуэлы, і падзеньне коштаў дрэнна адбіваецца на яе эканоміцы. Летась ВУП Вэнэсуэлы скараціўся на 5,7%, а інфляцыя дасягнула 180%.
Аналягічны энэргетычны крызіс з-за засухі здарыўся ў краіне ў 2010 годзе. Тады прэзыдэнт Уга Чавэс быў вымушаны ўвесьці надзвычайнае становішча.
