«Маршы недармаедаў» у Бабруйску, Воршы і Рагачове. Жывыя трансьляцыі

У Воршы пасьля «Маршу недармаедаў» затрымалі Паўла Севярынца і незалежных журналістаў, у тым ліку карэспандэнтку Свабоды Галіну Абакунчык

Пасьля акцыі супраць «дэкрэту пра дармаедаў» у Воршы затрыманыя сустаршыня БХД Павал Севярынец і кіроўцу аўто, які яго вез. Паралельна былі затрыманыя журналістка Радыё Свабода Галіна Абакунчык, фатограф БелаПАН Андрэй Шаўлюга і блогерка Анастасія Пілюгіна — іх завезьлі ў аршанскі РУУС​.

Дзяжурны міліцэйскага пастарунку ў Воршы паведаміў Свабодзе, што «Галіна Абакунчык не затрыманая, сама прыйшла і цяпер зь ёй размаўляюць, і як скончаць размаўляць, вернецца».

Пазьней міліцыя спыніла машыну з журналістамі «Белсату», на аператара Аляксандра Баразенку склалі адміністрацыйны пратакол. Група «Белсату» накіравалася ў РУУС, спрабавала ўзяць у будынку камэнтар у затрыманага Паўла Севярынца — у выніку міліцыя ў жывым эфіры затрымала і Баразенку, і журналістку Кацярыну Бахвалаву. Прычыны іх затрыманьня не названыя.

Каля Рагачова ДАІшнікі спынілі аўтамабіль з журналістамі «Белсат». Машыну сфатаграфавалі і сказалі, што яе трэба праверыць «на кантрабанду» і на «факт угону». Журналісты «Белсат» у сваёй наўпроставай трансьляцыі кажуць, што такім чынам ім хочуць перашкодзіць трапіць на акцыю.

Марш "Мы не дармаеды" ў Рагачове мусіць пачацца а 16.00.

Бабруйскі «Марш недармаедаў» у 10 фота

• ГУ

У Бабруйску 12 сакавіка прайшоў мітынг супраць «дэкрэту пра дармаедаў», сабраліся сотні чалавек. Адначасова акцыі адбыліся ў Воршы і Берасьці, пазьней мае пачацца акцыя ў Рагачове. Бабруйская акцыя прайшла фактычна без арганізатараў. Людзі трымалі плякаты «Праз дэкрэты і налогі хутка ўсе працягнем ногі», «Не дэкрэту №3», «Заплаці падаткі і сьпі галодным», «Разам – мы сіла», «Дэкрэту – не, рабоце – так», гукалі «Нет декрету №3, Лукашенко, уходи!», «Сыходзь!» і «Свабоду!».

Андрэй Дзьмітрыеў паведаміў, што ў Воршы затрыманы лідэр рэгіянальнай арганізацыі «Гавары праўду!» Ігар Грышанаў.

На цэнтральнай плошчы ў Воршы сабралася некалькі соцень удзельнікаў акцыі супраць дэкрэту №3. Людзі вырашылі скласьці рэзалюцыю і занесьці яе ў райвыканкам. Пасьля абмеркаваньня прапановаў рушылі ў райвыканкам, каб сустрэцца зь мясцовымі чыноўнікамі.

У Воршы акцыя адбываецца пад бел-чырвона-белымі сьцягамі, людзі калёнай па ходніках ідуць да гарадзкой адміністрацыі. На плошчы, дзе першапачаткова адбыўся збор удзельнікаў акцыі, вельмі гучна ўключаныя мэгафоны з музыкай, таму мітынг там праводзіць немагчыма.

Да ўдзельнікаў акцыі ў Воршы выйшаў прадстаўнік гарадзкой адміністрацыі. Праз мэгафон ён кажа, што мітынг несакцыянаваны і запрашае прайсьці ў залю. Людзі адмаўляюцца, скандуюць «Жыве Беларусь!», «Ганьба», «Далоў, уладу».

Павал Севярынец, сустаршыня БХД: «На плошчы гарадзкія ўлады ўключылі гучную музыку, нібыта нейкае сьвята. А людзі ня могуць пракарміць свае сем’і, няма ніякага сьвята для іх. Дэкрэт №3 – гэта была апошняя кропка. Але цяпер мы патрабуем ня толькі яго скасаваньня, мы патрабуем, каб гэты рэжым-банкрут сышоў. Нам не патрэбныя Лукашэнка, Качанава, Кабякоў, Лісоўскі».

Севярынец заявіў, што ўлады бачаць, што людзі сабраліся разам, што акцыі адбываюцца па ўсёй Беларусі. Таму, на яго думку, пачалася новая хваля рэпрэсіяў. Удзельнік падтрымліваюць Севярынца, скандуючы : «Далоў халуёў» і «Жыве Беларусь!».

Таксама Севярынец заклікаў аршанцаў далучацца да акцыяў 15 і 25 сакавіка ў Менску: «Вырашацца ўсё будзе ў сталіцы. 15 і 25 сакавіка мы павінны праявіць салідарнасьць».

Мясцовыя жыхары атачылі колам Севярынца, каб яго не затрымалі.

А 13.00 пачалася акцыя супраць дэкрэту №3 у Воршы. Разам з пратэстоўцамі – сустраршыня БХД Павал Севярынец.

Севярынец сказаў, што ў лідэраў акцыі забралі гукаўзмацняльнікі. На плошчы вельмі гучна ўключаная музыка, таму людзі скардзяцца, што ня чуюць прамоваў. Сыгнал сотавых апэратараў на плошчы надзвычай слабы.

Тым часам у Берасьці, дзе акцыю на сёньня не анансавалі, сабраліся дзясяткі людзей, ідуць маршам па вуліцы Савецкай:

Жанчына ў Бабруйску плача, яна ня ведае, як жыць далей: «У мяне гістэрыка! Лукашэнка павінен сесьці ў падумаць, як нам жыць. У 90-я гады было нашмат лепш. Я столькі год жыву ў гэтым горадзе, але так кепска ніколі не было. Я ня ведаю, як жыць далей».

Людзі скардзяцца на тое, што «рвуцца сем’і», што вымушаныя працаваць за мяжой:

«Гэтая ўлада павінна мне заплаціць 360 рублёў, бо я ня бачыў, як рос мой сын, як старэла мая жонка. Нам па тэлебачаньні паказваюць, як дзяржава клапоціцца пра сям’ю, але насамрэч сем’і распадаюцца, бо людзі павінны разлучацца, каб зарабіць на хлеб», — абураецца адзін з пратэстоўцаў.

«Я хачу, каб мой муж жыў са мной. А не ў іншай краіне на заробках. Мне прыслалі «ліст шчасьця», таму што я сяджу дома з двума дзецьмі. Мая мама працуе на пэнсіі, атрымлівае 200 рублёў. Мы сядзім і чакаем мужчын, гадаем, ці прывязуць грошы», — кажа жанчына зь дзіцём.

Мужчына на акцыі ў Бабруйску патрабуе, каб Лукашэнка даў справаздачу за свае рэзыдэнцыі, адпачынкі ў Сочы, за тое, колькі грошай ён траціць на сябе: «Хай за кожную капейку адчытаецца».

Людзі абураныя, што іх у дзяржаўных СМІ называюць дармаедамі, некаторыя не задаволеныя, што дзяржава патрабуе плаціць за прыватызацыю кватэр, якія былі атрыманыя за часам Савецкага саюзу.

Адзін з удзельнікаў пратэсту ў Бабруйску, Рыгор Грык, прыехаў на акцыю ў паласатай вопратцы турэмнага вязьня з Баранавіч. Ён сказаў, што людзі ў Беларусі пачуваюцца як вязьні. Мужчына сказаў, што такім чынам выказвае салідарнасьць зь лідэркай прафсаюзу РЭП Галінай Сьмірновай, якую затрымалі сёньня раніцай.