Абвешчана перамір'е. Апазыцыя выставіла Януковічу ультыматум

У даведцы аб сьмерці Жызьнеўскага прычына сьмерці не названая

Украіне патрэбныя новыя выбары, — кіраўнік Эўрапарлямэнту

Прэзыдэнт Украіны Віктар Януковіч у сытуацыі масавых акцый пратэсту, якія працягваюцца ў дзяржаве ўжо два месяцы, павінен бы распусьціць Вярхоўную Раду і правесьці датэрміновыя выбары.

Пра гэта кіраўнік Эўрапейскага парлямэнта Марцін Шульц заявіў у інтэрвію нямецкаму выданьню Deutschlandfunk:

«Давайце паглядзім фактах у вочы. Януковіч кіраваў краінай з большасьцю ў парлямэнце і з падтрымкай большасьці грамадзтва. Гэта зьмянілася. Кожны разважлівы прэзыдэнт у гэтай сытуацыі распусьціў бы парлямэнт і абвясьціў новыя выбары».

У Роўне захапілі адміністрацыю

Пасьля Народнага веча пратэстоўцы ва ўкраінскім горадзе Роўна накіраваліся да памяшканьня Ровенскай аблдзяржадміністрацыі і захапілі яе, паведамляе УНІАН.

Януковіч заклікаў правесьці пазачарговую сэсію Вярхоўнай Рады

Паводле ўкраінскага прэзыдэнта, неабходнасьць скліканьня Рады абгрунтаваная беспарадкамі, якія адбываюцца на вуліцах Кіева.

Старшыня ВР Уладзімер Рыбак пагадзіўся з прапановай прэзыдэнта. «Думаю, што я сёньня ўжо падпішу такое распараджэньне і на пачатку тыдня мы запросім дэпутатаў Вярхоўнай Рады, каб разглядзець усе пытаньні, што сёньня паўстаюць», — перадае «Ўкраінская праўда».

Эштан і Фюле едуць у Кіеў

Кэтрын Эштан, вярхоўны прадстаўнік ЭЗ па пытаньнях зьнешняй палітыкі і палітыцы бясьпекі наведае Кіеў на наступным тыдні — паведамляе Інтэрфакс-Украіна http://interfax.com.ua/news/political/187122.html

Гэтую інфармацыю пацьвердзіў прадстаўнік ЭЗ Аліўе Байлі.

Візыт эўрапэйскага камісара Штэфана Фюле ў Кіеў адбудзецца 24-25 студзеня.

Беларускае пасольства ў Кіеве рэкамэндуе не наведваць месцы пратэстаў

Паведамленьне разьмешчанае на сайце амбасады. «Пасольства Рэспублікі Беларусь ва Ўкраіне рэкамэндуе беларускім грамадзянам, якія знаходзяцца ў Кіеве, устрымацца ад наведваньня месцаў актыўных пратэстных дзеяньняў», — гаворыцца ў паведамленьні.

Учора стала вядома, што адзін з загінулых падчас падзеяў у Кіеве, грамадзянін Беларусі Міхаіл Жызьнеўскі. Беларускае МЗС пакуль не пацьвярджае гэтую інфармацыю.

У Івана-Франкоўску мітынгоўцы захапілі кабінэт губэрнатара

Каля будынку адміністрацыі Івана-Франкоўску сабралася паўтысячы чалавек. Частцы ўдалося праравацца ў кабінэт губэрэнатара Васіля Чуднова. Ад яго запатрабавалі напісаць заяву пра адстаўку, але ён адмовіўся. У аблозе мітынгоўцаў таксама знаходзіцца будынак абласной адміністрацыі ў Жытоміры. http://www.pravda.com.ua/news/2014/01/23/7010994/

Яцанюк: Перамовы апазыцыі і ўлады пачнуцца а 17:30 па ўкраінскім часе

Пра гэта Арсэнь Яцанюк паведаміў праз свой акаўнт у твітары.

У чаканьні перамоваў на вуліцы Грушэўскага ў Кіеве — на месцы самых жорсткіх сутыкненьняў — працягваецца перамір’е. Мітынгоўшчыкі пагасілі агонь на сваёй тэрыторыі. Байцы ўнутраных войскаў стаяць кардонам.

Перамір’я ўдалося дамагчыся лідару УДАРу Віталю Клічко, які, па ягоных словах, дамовіўся з афіцэрамі «Беркута».

Падпалкоўнік міліцыі Казлоў: У нас Майдан таксама магчымы

Кіеў. Думкі падчас замірэньня

Жыхарка Кіева Алена Літвінава камэнтуе для Свабоды новы дзень супрацьстаяньня ва Ўкраіне, сёньняшняе замірэньне.

Сьвечкі і кветкі ля помніка Шаўчэнку

Падзеі ва Ўкраіне вачыма менчукоў

Януковіч запатрабаваў неадкладна вызваліць усіх затрыманых журналістаў

«Журналісты выконваюць свае прафэсійныя абавязкі і дзеля абставінаў трапляюць у розныя сытуацыі. Я прашу з разуменьнем ставіцца да гэтага і па магчымасьці садзейнічаць працы журналістаў», — прыводзіць словы прэзыдэнта «Інтэрфакс-Украіна».

Па стане на 22 студзеня паведамлялася пра 42 пацярпелыя журналісты. Пры затрыманьні былі моцна зьбітыя журналісты Радыё Свабода Дзмітры Бракар і Ігар Ісхакаў. Гумовыя кулі трапілі ў беларускіх фотажурналістаў Сяргея Грыца і Васіля Фядосенку. Неаднаразова паведамлялася пра тое, што праваахоўнікі адмыслова «абстрэльваюць» журналістаў, каб прымусіць іх сысьці зь месца падзеяў.

23 студзеня быў затрыманы і моцна зьбіты расейскі журналіст Андрэй Кісялёў. Пазьней яго адпусьцілі.

Сілавікі распранулі дагала і зьдзекуюцца з затрыманага на вуліцы Грушэўскага ў Кіеве.
Асьцярожна, шакавальнае відэа!

У Гомелі ўшанавалі памяць загінулага на Эўрамайдане земляка

23 студзеня прадстаўнікі дэмакратычных арганізацый Гомеля ўшанавалі памяць забітага на Эўрамайдане ў Кіеве земляка Міхаіла Жызьнеўскага. А 15-й гадзіне яны прыйшлі ў сквэр на вуліцы Барыкіна, дзе ўсталяваны помнік Тарасу Шаўчэнку, з чырвонымі гвазьдзікамі і памінальнымі зьнічамі.


Прыбраўшы сьнег з пастамэнта, маладзёны ўсклалі чырвоныя гвазьдзікі і запалілі зьнічы ля помніка ўкраінскаму Кабзару — на знак салідарнасьці і ўшанаваньня памяці змагароў, якія загінулі за незалежнасьць і эўрапейскі шлях разьвіцьця Ўкраіны.

Мужчына, зь якога зьдзекуецца «Беркут» — Міхаіл Гаўрылюк

Апазнаны мужчына, зь якога на відэа, што шакавала інтэрнэт, жорстка зьдзекуюцца байцы «Беркута». Гэта Міхаіл Гаўрылюк. Пра гэта ў фэйсбуку паведаміў народны дэпутат Украіны, кіраўнік намётавага мястэчка Эўрамайдану Андрэй Парубій. «Хлопец, зь якога зьдзекаваўся „Беркут“ — добраахвотнік з Чацьвёртай казацкай сотні самаабароны, Міхаіл Гаўрылюк. Цяпер ён знаходзіцца ў штабе Самаабароны Майдана. Мы аказваем яму мэдычную дапамогу. Хутка ён выйдзе на брыфінг».

Штаб нацыянальнага супраціву склікае ўсіх на Майдан а 20 гадзіне

Людзей заклікаюць ухваліць сумесныя рашэньні пра далейшыя дзеяньні.

Лідэры апазыцыі знаходзяцца на перамовах з прэзыдэнтам Віктарам Януковічам. На гэтым час на вуліцы Грушэўскай — у месцы найбольш жорсткіх супрацьстаяньняў — працягваецца замірэньне.

Віцэ-прэзыдэнт Эўрапарлямэнту заклікаў да санкцый супраць украінскіх палітыкаў

Джані Пітэла, віцэ-прэзыдэнт Эўрапэйскага парлямэнту ў чарговы раз заклікаў да санкцый супраць палітыкаў ва Ўкраіне, якія адказныя за рэпрэсіі супраць мітынгоўцаў.

«Тады як ЗША ўжо прадугледзелі санкцыі супраць украінскіх палітыкаў, мы ж (эўрасупольнасьць) стаім убаку і робім выгляд, што назіраем, а ў выніку проста няздольныя заняць канкрэтную пазыцыю», — заявіў Пітэла італьянскаму выданьню La Repubblica.

22 сьнежня стала вядома, што Дзяржаўны дэпартамэнт ЗША скасаваў візы для некалькіх украінскіх палітыкаў. Паведамляецца, што ЗША разглядаюць магчымасьць увядзеньня іншых санкцый для тых, хто адказны за гвалт над людзьмі.

У той жа час сёньня канцлер Германіі Ангела Мэркель заявіла, што абураная сытуацыяй ва Ўкраіне, а ў прыватнасьці ўхваленымі 16 студзеня законамі, якія пагражаюць грамадзкім свабодам. Аднак канцлер пакуль ня бачыць перадумоваў для ўвядзеньня санкцый.

http://www.radiosvoboda.org/content/article/25238961.html

Людзей на Майдане забіла не міліцыя — МУС Украіны

Беларус Міхаіл Жызьнеўскі і армянін Сяргей Нігаян, якія загінулі 22 студзеня ў Кіеве, памерлі ў выніку агнястрэльных ранаў. Такую заяву зрабіў намесьнік начальніка Галоўнага сьледчага ўпраўленьня МУС Украіны Віталь Сакал па выніках экспэртызы целаў забітых.

Сьмерць Сяргея Нігояна наступіла ў выніку раненьняў карцеччу на аснове сплаву свінца. Міхаіл Жызьнеўскі загінуў ад паляўнічай кулі.

«Патроны, якімі нанесеныя цялесныя пашкоджаньні абодвум загінулым, на ўзбраеньні падразьдзяленьняў ведамства не знаходзяцца і міліцыяй не выкарыстоўваюцца. Да таго ж супрацоўнікі міліцыі і ваеннаслужачыя ўнутраных войск, якія нясуць службу па ахове грамадзкага парадку, знаходзяцца там бяз табельнай агнястрэльнай зброі», — пераконвае Сакал.

Чаркасцы бяруць штурмам аблдзяржадміністрацыю