Храналёгія справы Аляксандра Коржыча

СК заводзіць крымінальную справу. Затрыманых пакуль няма. Афіцыйны прадстаўнік Сьледчага камітэту Сяргей Кабаковіч расказвае, што сярод вэрсій, якія разглядаюцца, ёсьць і «дзедаўшчына».

Сьледчы камітэт паведамляе пра затрыманьне па справе Аляксандра Коржыча адразу некалькіх сяржантаў і афіцэраў. Амаль адначасова з гэтым дзяржаўныя СМІ распаўсюджваюць словы кіраўніка краіны Аляксандра Лукашэнкі. Ён публічна абяцае разабрацца ў сытуацыі. Прэс-сакратар Лукашэнкі звоніць Сьвятлане Коржыч і запрашае ў Менск на сустрэчу са сьледчымі.

Маці Аляксандра Коржыча дае чарговае інтэрвію, у якім расказвае новыя падрабязнасьці пра службу сына ў Печах. Яна настойвае, што вэрсія аб самагубстве сына не адпавядае рэчаіснасьці.

Першыя інтэрвію з роднымі затрыманых па справе Коржыча сяржантаў і афіцэраў. Жонка прапаршчыка Артура Вірбала расказвае Свабодзе, што ня верыць у датычнасьць мужа да сьмерці салдата.

Справа Коржыча набывае ўсё большы розгалас. Былыя салдаты тэрміновай службы, якія служылі там, пачынаюць расказваць пра свой досьвед. Фэномэн Печаў як аднаго з самых непрыемных месцаў для вайсковай службы разьбіраюць вайсковыя экспэрты

Пашыраецца інфармацыя пра іншыя выпадкі сьмерці маладых салдат у войску. Іх родныя выходзяць на сувязь з журналістамі і расказваюць, як праходзіла сьледзтва і да чаго прыйшло. Маці Арцёма Басьцюка, які загінуў за паўгода да Коржыча, у відэаінтэрвію Свабодзе расказвае пра сустрэчу зь міністрам абароны Андрэем Раўковым.

Пра справу Коржыча выказваецца генэральны пракурор Аляксандар Канюк. Па яго словах, сьледчыя пасьля гібелі салдата ў Печах распачалі «каля 15 крымінальных спраў». З 15 службоўцаў, якія фігуруюць у справе, абвінавачаньне выстаўленае дзесяці (8 сяржантам, прапаршчыку і афіцэрам), яны пад вартай; яшчэ пяцёра — у статусе падазраваных, паведамлялі раней у СК. Разам з тым нікому зь іх не прад’яўленыя абвінавачваньні ні ў забойстве, ні ў давядзеньні да самагубства.

Першыя зьмены ў войску, да якіх прывяла справа Коржыча. Навабранцам у Печах дазволілі карыстацца мабільнымі тэлефонамі (бяз камэры і інтэрнэту), на тэрыторыі часткі зьявіліся камэры відэаназіраньня. Аднак прапанова Лукашэнкі не забіраць у войска адзінага сына ў сям’і не была рэалізаваная.

Расьсьледаваньне справы аб гібелі Аляксандра Коржыча працягнутае. СК заяўляе, што займаецца пераглядам усіх спраў аб гібелі і траўмаваньні салдат за апошнія шэсьць гадоў. Сьвятлана Коржыч заяўляе, што ня згодная з вынікам мэдычнай экспэртызы, якая не знайшла на сынавым целе сьлядоў пабояў.

Маці Аляксандра Коржыча Сьвятлана дае першае пасьля працяглага перапынку інтэрвію, у якім расказвае пра падрабязнасьці расьсьледаваньня сьмерці сына. Яна ўпэўненая, што справу спускаюць на тармазах.

У СМІ трапляюць зьвесткі пра суды над прапаршчыкам і афіцэрам зь Печаў, якія былі абвінавачаныя ў хабарніцтве і дзедаўшчыне. Хоць гэтыя справы не зьвязаныя са сьмерцю Коржыча, яны выклікаюць вялікі розгалас.

Аляксандар Коржыч, які праходзіў службу ў Печах пад Барысавам, быў даведзены да самагубства. Пра такія высновы сьледзтва паведаміў 19 красавіка журналістам начальнік галоўнага сьледчага ўпраўленьня Сьледчака мітэту Алег Шандаровіч.

Сьледчыя эксгумавалі цела салдата Коржыча на патрабаваньне маці. Сьвятлана Коржыч знаёмілася з матэрыяламі справы на працягу ўсяго траўня, пасьля чаго зьвярнулася ў СК і адміністрацыю Лукашэнкі з патрабаваньнем правесьці эксгумацыю цела сына для правядзеньня дадатковай мэдыцынскай экспэртызы.

Справу Коржыча перадалі ў Генпракуратуру. Чакаецца, што на наступным тыдні Вярхоўны суд вызначыць, дзе яна будзе разглядацца.

Пачатак працэсу. Справу разглядае Менскі абласны суд у будынку суда Маскоўскага раёну. Для паседжаньняў выбралі адну з самых вялікіх судовых заляў гораду. На лаве падсудных былыя сяржанты роты Коржыча – Яўген Бараноўскі, Антон Вяжэвіч і Ягор Скуратовіч.

Працэс прыпынены на хадайніцтва пракурора. Абвінавачаныя заявілі, што давалі паказаньні пад ціскам КДБ і сказанае імі падчас папярэдняга сьледзтва не адпавядае рэчаіснасьці. Заявы абвінавачаных аб фізычным і маральным ціску правяраюць супрацоўнікі Сьледчага камітэту.

Пачатак суду над кіраўніцтвам роты Аляксандра Коржыча. Прапаршчыка Артура Вірбала і старшага лейтэнанта Паўла Сукавенку судзяць за злоўжываньне ўладай. Пацярпелымі на гэтым працэсе прызнаныя абвінавачаныя ў сьмерці Коржыча сяржанты.

Менскі абласны суд агучыў вырак па справе былых камандзіраў роты, у якой служыў Аляксандар Коржыч. Суд прызнаў іх вінаватымі ў перавышэньні ўлады. Камандзіра роты, старшага лейтэнанта Паўла Сукавенку прыгаварылі да 6 гадоў пазбаўленьня волі. Ягонага намесьніка, прапаршчыка Артура Вірбала — да 4 гадоў пазбаўленьня волі.