Рэфэрэндуму ня будзе. Лукашэнка выступіў са штогадовым пасланьнем да дэпутатаў і народу. Цытаты і камэнтары

Пра карупцыю

Карупцыя, хабарніцтва здольныя падарваць аснову любой дзяржавы заявіў Лукашэнка.

«Недатыкальных няма і ня будзе. Ня ўсе зразумелі зь першага разу, таму давялося разьвітацца зь міністрам спорту, міністрам лесу, дырэктарам дэпартамэнту па авіяцыі. Міністэрства транспарту зарвалася да немагчымасьці».

Чарговым разам Лукашэнка абрынуўся на пасярэдніцтва ў эканоміцы. Але ў рынкавай эканоміцы такой праблемы проста няма. Гэта праблема выключна дзяржаўнага сэктару.

Лукашэнка канстатуе правал амаль усіх інвэстыцыйных праектаў. Нарэшце ён прызнаў, што незразумела, што рабіць з АЭС, як яна будзе упісвацца ў беларускую эканоміку. Выдатны вынік 24-гадовага кіраваньня.

Старшыня Аб’яднанай грамадзянскай партыі Анатоль Лябедзька пра адмову Лукашэнкі ад рэфэрэндуму:

«Ерэван адгукнуўся ў Авальнай залі».

Пра даўгабуды і АЭС

Лукашэнка скрытыкаваў маштабныя інвэстыцыйныя праекты, якія зь невядомых прычынаў замарозіліся. Сьветлагорскі завод праз тры месяцы спыніўся, кардонны завод у Добрушы зусім не працуе. Цэмэнтная прамысловасьць у заняпадзе, нафтахімічная сфэра не вытрымлівае крытыкі. Больш за 10 мільярдаў даляраў укладзена ў АЭС, а так і невядома, як станцыя будзе ўбудаваная ў эканоміку краіны.

Некалькі разоў Лукашэнка вяртаецца да падзеяў у Армэніі. Відаць, яны моцна яго ўразілі. Ён нават ня ўтойвае свой страх перад рэвалюцыямі. Што ў каго баліць...

Пра зьмены ў Канстытуцыю і зноў пра Армэнію

Лукашэнка даручыў судзьдзям Канстытуцыйнага суду падрыхтаваць прапановы па ўнясеньні «тэхнічных зьменаў».

«Але зьменаў пад канкрэтную асобу ніколі ня будзе — як гэта мы пабачылі на прыкладзе Армэніі. Ня трэба было пераводзіць прэзыдэнцкую рэспубліку ў парлямэнцкую, вось і адгукнулася. Навошта мяняць асновы дзяржавы, ламаць пад нейкую асобу? Тое і адбылося. У гэтай сытуацыі толькі жадаю армянскаму народу, каб не захапіліся барацьбой».

Пра расейскую прапаганду

«Сёньня расейскія прапагандысты гатовыя ваяваць з усім сьветам. Але калі гэты касьцёр разгарыцца, то яны першыя разам са сваімі дзецьмі там і апынуцца. Гэта тычыцца і нашых дзеячоў, якія толькі і чакаюць спрыяльнага моманту. Ад нас павінны сыходзіць толькі мірныя ініцыятывы, ліміт рэвалюцый і войнаў мы вычарпалі», — падсумаваў Лукашэнка.

Рэфэрэндуму ня будзе. Цікава, як Лукашэнка перавярнуў сытуацыю.

Аказваецца, гэта апазыцыя, праціўнікі патрабуюць зьмены Канстытуцыі і рэфэрэндуму. Не выпадкова адмову ад рэфэрэндуму Лукашэнка зьвязаў з армянскімі падзеямі і Майданам. Думаю, гэта моцна ацьвярэзіла і астудзіла яго. Такім чынам, усё адкладваецца на няпэўны час.

Сяргей Чалы, эканаміст, камэнтуе заявы Лукашэнкі пра ІТ-краіну

«На пытаньне пра тое, ці можа Беларусь стаць ІТ-краінай, вельмі добра днямі адказаў на форуме ў Менску Сол Сінгэр з Ізраілю. Ён адзначыў, што ў Ізраілі гэта вяршыня айсбэрга: велізарныя інфраструктуры, моцныя эканомікі, добрая адукацыя, добрая ахова здароўя.

Гэтыя рэчы растуць зьнізу ўверх. А вырашаць іх праз насаджваньне тэхналягічных паркаў, як у нас звычайна дзейнічае дзяржава, зьверху ўніз, верагодна няправільна».

Пра падзел паўнамоцтваў і Майдан

Жыцьцё мяняецца, павінны мяняцца і законы, адзначыў Лукашэнка. Але гэта тычыцца дробных нормаў, якія наўпрост не ўплываюць на жыцьцё людзей. Лукашэнка прызнаў, што частку паўнамоцтваў можна перадаць іншым галінам улады, а ў яго тым часам зьяўляюцца новыя клопаты.

«Але калі хтосьці разьлічвае, што будзе створаны падмурак для майданаў і майданутых, то гэтага ня будзе», — запэўніў Лукашэнка.

Пра рэфэрэндум

«Пра рэфэрэндум па зьмене нормаў Асноўнага закону я нават ня думаў. Я ніколі не парушу сваю клятву, а то будзе, як учора ў Армэніі. Нам зараз не да рэфэрэндуму. Нам галоўнае выстаяць, а не каб муць падняць у краіне. Вы ж бачыце, хто патрабуе зьменаў. Яны ж ня будуць адказваць, якія наступствы будуць мець зьмены Канстытуцыі. Трэба спыніць гэтае бражэньне ў грамадзтве».