Дата дня
7 верасьня 2020 году кіраўніцу штабу Віктара Бабарыкі на прэзыдэнцкіх выбарах Марыю Калесьнікаву схапілі сілавікі і назаўтра спрабавалі прымусова яе вывезьці ва Ўкраіну. Аднак Калесьнікава на мяжы парвала свой пашпарт, вылезла праз вакно з аўтамабіля і вярнулася на тэрыторыю Беларусі. Там яе адразу затрымалі. 6 верасьня 2021 году на закрытым працэсе яе асудзілі на 11 гадоў зьняволеньня. 13 сьнежня 2025 году яе вызвалілі і прымусова вывезьлі зь Беларусі.
Таксама ў гэты дзень
1764 — Станіслаў Аўгуст Панятоўскі абраны на караля польскага і вялікага князя літоўскага. Каранавалі яго пазьней, 25 лістапада.
1812 — падчас вайны паміж Расеяй і Францыяй адбылася Барадзінская бітва.
1953 — Мікіту Хрушчова абралі першым сакратаром ЦК КПСС.
2003 — у Полацку паставілі помнік літары Ў.
2019 — у Лідзе адкрылі конны помнік вялікаму князю Гедзіміну.
У гэты дзень нарадзіліся
1832 — Людвік Нарбут, адзін з кіраўнікоў паўстаньня 1863–1864 гадоў у Беларусі і Літве.
1885 — Палута Бадунова, беларускі палітык, адна зь лідэрак Беларускай партыі сацыялістаў-рэвалюцыянэраў, сябра Рады і Народнага сакратарыяту Беларускай Народнай Рэспублікі.
1919 — Алесь Асіпенка, беларускі пісьменьнік, сцэнарыст, заслужаны работнік культуры БССР (1979).
1935 — Станіслаў Астапчык, беларускі вучоны ў галіне матэрыялазнаўства і фізыкі мэталаў.
1941 — Уладзімер Гайдук, беларускі паэт на Падляшшы.
1957 — Віктар Ганчар, беларускі палітык. 16 верасьня 1999 году Ганчар разам са сваім сябрам, бізнэсоўцам Анатолем Красоўскім, прапалі бязь вестак. Пазьней на месцы, дзе, як мяркуецца, адбылося выкраданьне, знайшлі аскепкі шкла аўтамабіля і сьляды крыві.
У памяці
1954 — Лявон Карась, журналіст беларускай службы Радыё Вызваленьне, памёр у Мюнхэне пры загадкавых абставінах у 30-гадовым узросьце.
1989 — Анатоль Трус, актор, народны артыст Беларусі.
2004 — Алесь Асташонак, беларускі пісьменьнік і перакладчык .
