Каля 23-й гадзіны пажар удалося зьліквідаваць, паведаміла раніцай Міністэрства надзвычайных сытуацый.
Але празь некалькі гадзінаў МНС паведаміла пра пажар у тым жа месцы і на ўтрая большай тэрыторыі.
Сёньня ў Парэцкім сельсавеце Гарадзенскага раёну гарыць ужо каля 30 гектараў лесу.
Вецер над пажарам паўднёва-заходні, дым ляціць на Літву. Жыхары Друскенікаў і ваколіцаў скардзяцца на едкі пах гарэлага, перадае Delfi. Жыхароў Літвы папярэдзілі пра забруджваньне паветра дымам і заклікалі як мага менш часу бавіць на вуліцы.
Паводле адміністрацыі Аранскага раёну Літвы, пажар на тэрыторыі Беларусі ўсчаўся каля 16:50. Уначы ён перакінуўся на тэрыторыю Літвы, там яго патушылі. «У той жа час на тэрыторыі Беларусі пажар усё яшчэ працягваецца», — адзначалі мясцовыя ўлады ў той час, калі паводле ранейшага паведамленьня МНС пажар ужо быў зьліквідаваны.
У Літвы зь Беларусьсю цяпер няма абмену інфармацыяй пра падобныя здарэньні, перадае LRT.
Усяго за мінулыя содні ў Беларусі патушылі 15 лясных пажараў агульнай плошчай амаль 12 гектараў, а таксама 59 пажараў травы і хмызьняку агульнай плошчай амаль 9 гектараў. Лясныя пажары былі ўва ўсіх вобласьцях, апроч Магілёўскай. Ува ўсіх вобласьцях краіны забаронена наведваць лясы.
Форум