Вячорка: У нас афігенная дыяспара, але ныцьцё пра тое, што ўсё кепска, дэматывуе, мы не ўмеем прадаваць посьпехі

Позірк

02 травень 2026, 15:51

V Канфэрэнцыя беларусаў сьвету ў Варшаве. Франак Вячорка

«У нас афігенная дыяспара, яна абсалютна неверагодная. І калі раней казалі: трэба павучыцца ў габрэяў, яшчэ ў кагосьці, — зараз усе вучацца ў нас і нам трэба проста разбудоўваць гэты патэнцыял, наколькі магчыма».

Такое меркаваньне выказаў галоўны дарадца Сьвятланы Ціханоўскай Франак Вячорка на дыскусіі «Палітычная адвакацыя: выклікі і магчымасьці» ў межах V Канфэрэнцыі беларусаў і беларусак сьвету (1-2 траўня, Варшава).

Паводле словаў вячоркі, палітыкам, палітычным структурам, самому офісу Ціханоўскай «не хапае вельмі часта канкрэтных кейсаў» той ці іншай праблемы.

«Бывае, прыяжджаем на сустрэчу, усе ныюць: усё кепска, нічога не выдаецца (напрыклад, дакумэнты. — „Позірк“.). Потым пачынаеш капаць: ніводнага канкрэтнага кейсу, які можна было б узяць, вырашыць», — заявіў Вячорка.

«Калі ў нас будуць канкрэтныя прыклады, прэцэдэнты, якія мы ствараем і вырашаем, потым іх лёгка маштабаваць на ўсю беларускую супольнасьць», — падкрэсьліў ён.

«Аднаго ныцьця пра тое, што ўсё кепска, недастаткова, — лічыць Вячорка. — Калі мы будзем казаць, што ўсё кепска, не вырашаецца, мы толькі дэматывуем і нашых партнэраў, і нашыя структуры».

На канфэрэнцыі ў Варшаве падчас выступу Ціханоўскай паднялі плякаты з крытыкай на яе адрас. ФОТА

1/15 Сьвятлана Ціханоўская з партрэтам палітвязьня Сьцяпана Латыпава

3/15 Зварот старшыні Рады Беларускай Народнай Рэспублікі Івонкі Сурвілы паказалі ў відэазапісе

4/15 Сьвятлана Ціханоўская выступае на канфэрэнцыі

5/15 Некалькі жанчын паднялі плякаты з крытыкай на адрас Ціханоўскай падчас яе выступу

10/15 Адзін з «круглых сталоў» на канфэрэнцыі

11/15 Дарадца Ціханоўскай Франак Вячорка (у цэнтры) сярод удзельнікаў канфэрэнцыі

13/15 Сьвятлана Ціханоўская адказвае на пытаньні журналістаў

14/15 Аляксандра Мамаева, старшыня міжнароднай камісіі Каардынацыйнай рады, адказвала на пытаньні пра «пашпарт новай Беларусі»

На думку дарадцы, трэба акцэнтаваць увагу на посьпехах, але «мы не ўмеем прадаваць сябе, прадаваць свае посьпехі». «Думаю, што тут (у Польшчы. — „Позірк“.) і па выніках гэтай канфэрэнцыі нам трэба пасьпяховыя прыклады запакаваць, раскруціць, паказаць іншым суполкам у іншых краінах, дзе меншая беларуская дыяспара, як гэта было вырашана. Супраца офіса, напрыклад, з гішпанскай дыяспарай у справе прызнаньня пратэрмінаваных пашпартоў — выдатны прыклад», — заявіў прамоўца.

На яго перакананьне, толькі супрацай дэмакратычных структур, палітыкаў, «якія адкрываюць дзьверы», і суполак на месцах можна дасягнуць выніку. «Калі мы будзем дзейнічаць паасобку, мы не адкрыем дзьверы альбо не давядзем справу да канца», — заявіў Вячорка.

Паводле яго слоў, вырашэньне канкрэтных праблем, іх маштабаваньне на наступны год павінна стаць прыярытэтам.

ГЛЯДЗІЦЕ ТАКСАМА:

У Варшаве пачалася канфэрэнцыя беларусаў і беларусак сьвету. Відэатрансьляцыя

Тэмы гэтага артыкулу

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.