«Беларускі памежнік паглыбіўся прыкладна на мэтар углыб тэрыторыі Літвы ў нядзейным кантрольна-прапускным пункце Кракуны. Потым ён сеў на бэтонны блёк, які перакрывае дарогу, і неўзабаве вярнуўся ў сваю краіну», — адзначаецца ў паведамленьні.
Згодна з інфармацыяй літоўскіх памежнікаў, чацьвёра ўзброеных беларускіх вайскоўцаў патрулявалі мяжу з боку мястэчка Геранёны ў Беларусі. Асаблівасьць гэтай мясцовасьці ў тым, што літоўскія паселішчы амаль з усіх бакоў атачае тэрыторыя Беларусі. Раней тут дзейнічаў памежны пункт Кракуны – Геранёны, закрыты ў 2020 годзе.
Літоўскія ўлады неаднаразова абвінавачвалі ўлады Беларусі ва ўчыненьні гібрыдных атак супраць Літвы. Гэта арганізацыя незаконных міграцыйных патокаў, запуск кантрабандных балёнаў, інфармацыйныя кампаніі, вэрбаваньне грамадзян Літвы.
Сёлета ў сакавіку Дэпартамэнт дзяржаўнай бясьпекі і Другі дэпартамэнт апэратыўных службаў Міністэрства нацыянальнай абароны Літвы прэзэнтавалі несакрэтную частку новай штогадовай ацэнкі пагрозаў нацыянальнай бясьпецы. Сярод іх крыніцаў назвалі Расею, Беларусь і Кітай.
Форум