Пра гэта паведаміў начальнік галоўнага ўпраўленьня ідэалягічнай работы і ў справах моладзі Менгарвыканкаму Аляксандр Лук’янаў (тут і далей цытаты відэа ў тэлеграм-канале Менгарвыканкаму.— Позірк).
Паводле яго, у Акадэміі кіраваньня плянуецца перападрыхтоўка «звыш 220 спэцыялістаў ідэалягічнай сфэры».
16 красавіка на паседжаньні Менгарвыканкаму на тэму фармаваньня ідэалягічнай вэртыкалі ў сталіцы абмяркоўвалі рэалізацыю дырэктывы Аляксандра Лукашэнкі нумар 12 «Аб рэалізацыі асноваў ідэалёгіі беларускай дзяржавы» «ня толькі ў дзяржаўным сэктары, але і ў прыватных арганізацыях», сказаў Лукʼянаў. Ён выказаў думку, што менавіта рэалізацыя дырэктывы дазволіла ідэолягам «у літаральным сэнсе дайсьці да ўсіх формаў уласнасьці і арганізацыяў».
«Бачым станоўчы водгук і зацікаўленасьць субʼектаў гаспадараньня ў рабоце паводле гэтага дакумэнту, перш за ўсё ў рабоце зь іх калектывамі... Можам канстатаваць, што работа выбудавана. Яна патрабуе ўдасканаленьня. Для нас прынцыповай задачай ёсьць якраз закрануць кожнага грамадзяніна нашай краіны», — падкрэсьліў чыноўнік.
У выніку паседжаньня сярод іншага вырашылі праводзіць пастаянны маніторынг, у канцы году ацэньваць работу кожнага намесьніка кіраўніка у сфэры ідэалёгіі.
Дырэктыву № 12 «Аб рэалізацыі асноваў ідэалёгіі беларускай дзяржавы» Лукашэнка падпісаў 9 красавіка 2025 году. «Прыярытэтнымі сфэрамі», у якіх ідэалягічная работа павінна праводзіцца «пад асаблівым кантролем дзяржавы», названыя адукацыя, культура, навука, спорт, этнаканфэсійныя адносіны, а таксама сямейная, моладзевая, інфармацыйная і гістарычная палітыка.
Адной з асноўных задачаў ідэалягічнай работы ў дырэктыве названа «дасягненьне разуменьня і шырокай падтрымкі насельніцтвам беларускай мадэлі грамадзкага разьвіцьця».
Да выхаду дырэктывы прадпрыемствы недзяржаўнай формы ўласнасьці ня мусілі наймаць у штат ідэолягаў.
- Лукʼянаў быў прызначаны галоўным ідэолягам Менску 19 верасьня 2025 году. Да гэтага ўзначальваў прадзяржаўны Беларускі рэспубліканскі саюз моладзі. Пасьля прызначэньня публічна прызнаўся ў карʼерызьме і паставіў інтарэсы народу на апошняе месца: «Сьпяшаюся падзяліцца з вамі радаснай навіной! У пятніцу 19 верасьня прыступіў да дзяржаўнай службы! Гэта вельмі адказная пасада ў структуры выканаўчай улады нашай сталіцы. Прыкладу ўсе намаганьні, каб апраўдаць высокі давер кіраўніцтва. Перакананы, што разам мы выканаем усе задачы, якія перад намі ставіць наш Прэзыдэнт, кіраўніцтва гораду і нашы паважаныя грамадзяне!» — напісаў Лукʼянаў у сваім тэлеграм-канале.
- 36-гадовы чыноўнік заявіў, што «зь юных гадоў імкнуўся стаць дзяржаўным службоўцам». «З упэўненасьцю магу сказаць, што менавіта як да дзяржаўнай службы ставіўся да працы і ў МНС, і ў выкладаньні, навуцы і да кіраўніцтва ў дзейнасьці нашага грамадзкага абʼяднаньня БРСМ. А зараз можна сказаць, што мара спраўдзілася афіцыйна!» — прызнаўся ідэоляг.
Форум