Дата дня
28 сакавіка 1985 году ў Францыі памёр Марк Шагал, адзін з самых знакамітых ураджэнцаў Беларусі, таленавіты жывапісец і графік, яскравы прадстаўнік мастацкага авангарду ХХ стагодзьдзя. Пахаваны на гарадзкіх могілках у мястэчку Сэн-Поль-дэ-Ванс, непадалёк ад Ніцы.
Гэты дзень у гісторыі
1854 — Вялікая Брытанія і Францыя абвясьцілі вайну Расеі, пачатак Крымскай вайны.
1926 — у Менску пачала выходзіць па-польску газэта «Orka».
1939 — войскі генэрала Франсіска Франка занялі Мадрыд, завяршылася грамадзянская вайна ў Гішпаніі.
1979 — адбылася адна з самых цяжкіх аварый у гісторыі ядзернай энэргетыкі — на АЭС Тры-Майл-Айлэнд, ЗША.
2016 — у Кіеве адбылося ўрачыстае адкрыцьцё помніка беларусам, якія загінулі за Ўкраіну, на Майдане падчас Рэвалюцыі Годнасьці ды ў зоне АТА — Міхаілу Жызьнеўскаму, Алесю Чаркашыну і Віталю Ціліжэнку.
2023 — арыштаваны Арцём Лябедзька, сын палітыка Анатоля Лябедзькі. Яго асудзілі на 3,5 года калёніі ўзмоцненага рэжыму.
У гэты дзень нарадзіліся
1515 — Тарэса Авільская, гішпанская манахіня, каталіцкая сьвятая.
1919 — Вера Палтаран, беларуская пісьменьніца.
1925 — Інакенці Смактуноўскі (пры нараджэньні Смактуновіч), савецкі і расейскі актор беларускага паходжаньня, народны артыст СССР.
1928 — Зьбігнеў Бжэзінскі, амэрыканскі палітоляг, сацыёляг і дзяржаўны дзеяч.
1934 — Кастусь Цьвірка, беларускі паэт, перакладчык, фальклярыст.
Сьпіны ўсе разгінайце —
Зьнікні, рабства арба!
У сабе забівайце
Палахліўца-раба!
Ды зрывайце бяз страху
Ланцугі — з ног і з душ:
Лепей легчы на плаху,
Чым зьвівацца, бы вуж!
1938 — Уладзімер Раговіч, беларускі харавы дырыжор, фальклярыст, пэдагог.
1940 — Уладзімер Мархель, беларускі літаратуразнаўца і паэт.
Зло ўсё роўна застанецца злом,
Колькі ні кідаць яго на злом.
1941 — Фэлікс Гумен, беларускі мастак, акварэліст.
1982 — Марыя Мартысевіч, пісьменьніца, перакладчыца.
Я перадам у спадчыну соль-ваду
і сырую бульбу, калі пакусалі восы,
мочкі вушэй і вострую бараду,
і чырвонае горла, калі па халодным босы.
Скаліёз улева і бубачку ад пісьма,
бо асадку сьціскаю моцна паводле звычаю;
а болей нічога такога ў мяне няма:
астатняе гэта я ў цябе запазычваю.
У памяці
1566 — Зыгмунд Гербэрштайн, нямецкі барон, дыплямат, падарожнік, які ў сваёй працы «Запіскі пра Масковію» прывёў гісторыка-этнаграфічныя, палітычныя і культурныя зьвесткі ў тым ліку пра Беларусь і Літву.
1584 — Іван IV, Жахлівы, расейскі цар, пры якім Маскоўскае княства неаднойчы ваявала зь Вялікім княствам Літоўскім.
1772 — Антоні Пшазьдзецкі, дзяржаўны дзяяч ВКЛ, уладальнік Заслаўя, меў тытул графа Заслаўскага.
1886 — Уладзіслаў Борзабагаты, мэдык, кіраўнік паўстаньня 1863-64 у Наваградзкім павеце, мэмуарыст.
1900 — Апалінар Гараўскі, мастак.
1911 — Марыя Косіч, фальклярыстка і пісьменьніца.
1943 — Сяргей Рахманінаў, расейскі і амэрыканскі кампазытар, дырыжор і піяніст.
1967 — Аляксандар Ільінскі, актор тэатру і кіно, народны артыст Беларусі.
1985 — Марк Шагал, сусьветна вядомы мастак, ураджэнец Беларусі.
1989 — Вера Палтаран, пісьменьніца.
1995 — Чэслаў Найдзюк, беларускі грамадзкі дзяяч.
2022 — Алесь Барскі, паэт і літаратуразнавец.
Яднайся, народзе, і сьмела наперад!
Жыве Беларусь сярод вольных народаў!
Жыць нельга шчасьліва бяз дружбы, бязь веры,
Жыць нельга шчасьліва бяз сонца свабоды.