Хроніка перасьледу 25 сакавіка: палітзьняволеная за кратамі ў цяжкім стане

Праваабарончая ініцыятыва dissidentBY паведаміла аб цяжкім стане палітзьняволенай Жанны Аўрамчык, якая знаходзіцца за кратамі з 2024 году.

«Жанчына прымае цяжкія лекі, бо ў яе дзьве анэўрызмы ў мозгу, праз што здараюцца прыступы. Падчас сьледзтва яна знаходзілася пад хатнім арыштам, але падчас абвяшчэньня прысуду яе ўзялі пад варту ў зале суда і адправілі за краты ў 2024 годзе», — адзначаецца ў паведамленьні.

Вядома, што муж Жанны працаваў на салігорскіх шахтах, але памёр ад анкалёгіі ў 2017 годзе. Жанчына асьвятляла гэтую гісторыю ў лякальных мэдыя, бо дактары своечасова не адрэагавалі на аналізы мужа.

Ад жанчын, якія адбывалі пакараньне разам з Жаннай, вядома, што яна дагэтуль знаходзіцца за кратамі ў цяжкім фізычным і псыхалягічным стане. Прысуд застаецца невядомым. Тым ня менш, Жанну Аўрамчык асудзілі двойчы паводле крымінальных артыкулаў. Сёлета ёй споўніцца 60 гадоў.

Праваабаронцы прызналі палітвязьнямі яшчэ 9 чалавек

1. Анжэла Агарок,
2. Уладзіслаў Вакульчык,
3. Вольга Вараб’ёва,
4. Вікторыя Грынько,
5. Уладзімір Захараў,
6. Віталь Каледа,
7. Барыс Крыцкі,
8. Вольга Харламава,
9. Ірына Якаўлева.

Цяпер у Беларусі 898 палітычных вязьняў, пра якіх ведаюць праваабаронцы «Вясны».

Трактарыста з Чавускага раёну асудзілі за «абразу» і «паклёп» на Лукашэнку

Сьцьвярджаецца, што ён ў «Аднаклясьніках» перапосьціў чатыры фатаздымкі з Лукашэнкам і пакінуў пад імі свае камэнтары — два зь іх нібыта мелі абразы, а яшчэ два — паклёп.

У выніку жыхару Чавускага раёну прызначылі 3 гады «хіміі», піша «Вясна».

ГЛЯДЗІЦЕ ТАКСАМА:

Хроніка перасьледу 23 сакавіка: экс-дырэктара алімпійскага цэнтру фрыстайлу завочна асудзілі на 12 гадоў