Паводле яго, праграма найперш будзе тычыцца нядаўна забароненай і незаконнай агнястрэльнай зброі. Улады чакаюць, што ў межах гэтай ініцыятывы будуць сабраныя і зьнішчаныя сотні тысяч адзінак агнястрэльнай зброі.
Прэмʼер-міністар адзначыў, што апошні раз законы аб зброі ў Аўстраліі істотна рэфармаваліся пасьля масавага забойства ў Порт-Артуры на Тасманіі ў 1996 годзе — тады загінулі 35 чалавек.
«Жудасныя падзеі ў Бондзі паказваюць, што нам трэба прыбраць больш зброі з нашых вуліц. Мы ведаем, што адзін з гэтых тэрарыстаў меў ліцэнзію на агнястрэльную зброю і шэсьць адзінак зброі, нягледзячы на тое, што жыў у самым цэнтры Бонірыге, прымесьця Сыднэя. Няма прычын, па якіх камусьці ў такой сытуацыі было б трэба столькі зброі».
Прэмʼер-міністар дадаў, што цяпер у Аўстраліі больш за чатыры мільёны адзінак агнястрэльнай зброі — гэта больш, чым было на момант стральбы ў Порт-Артуры амаль 30 гадоў таму.
Тэракт у Сіднэі адбыўся 14 сьнежня падчас цырымоніі запальваньня сьвечак з нагоды сьвята Ханука на пляжы Бондзі, куды прыйшлі прадстаўнікі мясцовай габрэйскай супольнасьці. Паводле зьвестак паліцыі, страляніну распачалі 50-гадовы бацька Саджыд Акрам, забіты пры затрыманьні, і ягоны сын Навід, выхадцы з Пакістану. Ахвярамі сталі 15 чалавек, больш за 40 былі параненыя.
Альбанэзэ назваў 14 сьнежня «чорным днём» для краіны, рэзка асудзіў антысэмітызм і паабяцаў абарону яўрэйскай супольнасьці.
Форум