Па стане на 1 сьнежня ў розных краінах сьвету за кратамі знаходзіліся 503 журналісты. Беларусь апынулася на 4 месцы ў сьвеце паводле колькасьці зьняволеных супрацоўнікаў мэдыяў і блогераў.
Найбольш зьняволеных журналістаў у Кітаі — 121. За Кітаем ідзе Расея з 48 зьняволеных журналістамі, зь якіх 26 — украінцы, піша арганізацыя «Рэпарцёры бяз межаў». Наступныя ў яе антырэйтынгу М’янма з 47 журналістамі за кратамі і Беларусь, дзе ў вязьніцах трымаюць 33 дзейных і былых супрацоўнікаў СМІ.
У аглядзе адзначаецца, што 11 верасьня 2025 году дзевяць беларускіх журналістаў і блогераў, у тым ліку Ігар Лосік з Беларускай службы Радыё Свабода, былі вызваленыя пасьля таго, як правялі гады за кратамі за выкананьне сваёй працы.
«Гэтыя журналісты былі вызвалены, а затым дэпартаваныя ў рамках перамоваў з урадам ЗША, што прывяло да вызваленьня 52 палітычных зьняволеных. (Насамрэч 51, бо палітвязень Мікалай Статкевіч адмовіўся пакідаць Беларусь, яго вярнулі за краты — Свабода) Аднак 33 журналісты ўсё яшчэ знаходзяцца пад вартай у гэтай краіне, дзе пасьля сфальсыфікаваных прэзыдэнцкіх выбараў 2020 года і наступнага разгону мірных пратэстаў амаль усе незалежныя мэдыя былі прымушаныя маўчаць, а іх журналісты былі затрыманыя або вымушаныя пакінуць краіну», — адзначаецца ў аглядзе «Рэпарцёраў бяз межаў».
Паводле агляду міжнароднай арганізацыі сёлета было зафіксавана 67 фактаў забойстваў журналістаў, 53 зь іх сталі ахвярамі войнаў альбо крымінальных сетак. 29 журналістаў загінула ў сэктары Газа, 9 — у Мэксыцы, 4 — у Судане, 3 — ва Ўкраіне.
135 журналістаў лічацца зьніклымі ў 37 краінах.
20 журналістаў утрымліваюць у закладніках па ўсім сьвеце. У Емэне ў 2025 годзе хусіты выкралі сем журналістаў, што зрабіла краіну эпіцэнтрам выкраданьняў, адзначаецца ў аглядзе «Рэпарцёраў бяз межаў».
Па стане на 9 сьнежня 2025 году ў вязьніцах Беларусі знаходзіцца 28 журналістаў, паведамляе БАЖ.
Форум