Паводле Сьледчага камітэту Беларусі, увечары 8 лістапада 2021 году невядомы, пераапрануўшыся ў форму супрацоўніка праваахоўных органаў (якая, як высьветлілася, належала бацьку фігуранта), падышоў да дому на праспэкце Ракасоўскага ў Менску. Каб трапіць у пад’езд, ён набраў нумар выпадковай кватэры на дамафоне і, назваўшыся паштальёнам, пераканаў жыхара адчыніць дзьверы. Падняўся на пяты паверх і пазваніў у кватэру, дзе жыла 33-гадовая жанчына з мужам і малалетняй дачкой. Жанчына адчыніла дзьверы, прагучаў стрэл. Калі яна ўпала, нападнік зрабіў яшчэ адзін стрэл ёй у галаву. Ад раненьняў жанчына памерла на месцы.
Яе мужу ўдалося ўцячы праз гаўбец, ён паведаміў аб здарэньні мінакам, якія выклікалі міліцыю.
У гэты час фігурант выйшаў з падʼезду і ўцёк, пакінуўшы за сабою сьляды крыві ад парэзу на руцэ. Неўзабаве сьледчыя выявілі асобу нападніка: Аляксандар Ліпскі, жыхар Менску.
Матыў — помста
Як адзін з магчымых матываў злачынства разглядалася помста. У 2019 годзе Ліпскага асудзілі за наўмыснае прычыненьне менш цяжкага цялеснага пашкоджаньня і асабліва злоснае хуліганства.
Пры сварцы з суседам Ліпскі напаў на яго, прычыніў яму цялесныя пашкоджаньні і распыліў пярцовы балёнчык у мінака, які спрабаваў умяшацца. Суд прызначыў пакараньне ў выглядзе пазбаўленьня волі, аднак Ліпскі ўцёк. Тады ж зьнікла яго маці. Бацька сьцьвярджаў, што ня бачыў сына з 2018 году, а жонку — з 2020-га.
Як пісалі «Минск-новости» аб матэрыялах справы год таму, сям’я на праспэкце Ракасоўскага магла стаць ахвярай забойцаў выпадкова. Зламысьнік плянаваў адпомсьціць роднай сястры загінулай і яе мужу. Менавіта зь ім Ліпскі пасварыўся і ў выніку быў асуджаны.
Сьмерць фігуранта і арышт яго бацькоў
Ліпскі і яго маці хаваліся. У жніўні 2024 году сілавікі атрымалі інфармацыю аб месцы жыхарства бацькі Ліпскага ў Менску разам з жонкай і самім Ліпскім. Калі байцы АМАПа і супрацоўнікі крымінальнага вышуку трапілі ў памяшканьне, бацька Ліпскага заявіў, што жыве адзін. Аднак на гаўбцы апэратыўнікі заўважылі замаскаваны люк. Падняўшы вечка, яны выявілі Ліпскага, які адкрыў агонь. У адказ міліцыянты ўжылі зброю. У перастрэлцы Ліпскі загінуў.
Як зразумелі сьледчыя, забойства жанчыны на праспэкце Ракасоўскага не было адзінай задумай сямʼі. Яны мелі намер адпомсьціць усім, хто меў дачыненьне да справы Ліпскага ў 2019 годзе.
У «чорным сьпісе» Ліпскіх нібыта было больш за 40 чалавек: пацярпелыя, іх сваякі, сьледчыя, супрацоўнікі міліцыі, пракуроры, судзьдзі, а таксама сьведкі ня толькі зь ліку суседзяў, але і лекары хуткай мэдычнай дапамогі, якія аказвалі дапамогу пацярпелым.
На допытах маці і бацька Ліпскага не прызналі віну, адмаўлялі якія-небудзь факты, сьцьвярджалі, што супраць іх зладзілі змову, а цела іхнага сына падкінулі ў кватэру, дзе рабілі затрыманьне.
Забітаму Аляксандру Ліпскаму, а таксама ягоным бацькам выставілі абвінавачаньні ва ўчыненьні злачынстваў у складзе арганізаванай групы паводле некалькіх артыкулаў Крымінальнага кодэксу: ч. 4 арт. 295 (незаконныя дзеяньні ў адносінах да агнястрэльнай зброі, боепрыпасаў і выбуховых рэчываў); п.п. 10, 15 ч. 2 арт. 139 (забойства асобы ці яе блізкіх у сувязі з выкананьнем ім грамадзкага абавязку, зьдзейсьненае групай асобаў); ч. 1 арт. 14, п.п. 1, 5, 10, 15, 16 ч. 2 арт. 139 (замах на забойства дзьвюх і больш асобаў). Справу перадалі ў суд.
Форум