Выбуховая прылада зьнішчыла чыгуначныя рэйкі, паведаміў прэм’ер-міністар Польшчы Дональд Туск на плятформе X.
Прэмʼер-міністар дадаў, што на месцы здарэньня працуюць службы тэрміновай дапамогі й пракуратура.
Раніцай у нядзелю, 16 лістапада, машыніст цягніка паведаміў праз тэлефон аб парушэньні чыгуначнай інфраструктуры ў раёне Жычына Гарволінскага павету, каля чыгуначнай станцыі Міка, паведаміла ваяводзкая паліцыя ў Радаме, піша агенцтва PAP.
Паводле інфармацыі мазавецкай паліцыі, папярэдняя праверка рэек выявіла пашкоджаньні на адным з участкаў. Ніхто не пацярпеў.
У ліпені польскія ўлады затрымалі 32 чалавек, падазраваных у супрацы з расейскімі спэцслужбамі для арганізацыі дывэрсіяў у краіне. У злачынную групу ўваходзілі грамадзяне Польшчы, Расеі, Украіны, Беларусі й Калюмбіі. Паводле зьвестак Агенцтва ўнутранай бясьпекі Польшчы, злачынствы былі ўчыненыя ці падрыхтаваныя на ўказаньні супрацоўнікаў расейскай выведкі.
Расея адмаўляе абвінавачваньні ва ўдзеле ў дывэрсіях і актах сабатажу ў Польшчы.
Форум