У Кіеве ў выніку начной атакі расейцаў бесьпілётнікамі загінуў адзін чалавек, паведаміла ўкраінская служба Свабода са спасылкай на кіраўніка Кіеўскай гарадзкой вайсковай адміністрацыі Цімура Ткачэнку.
Чыноўнік паведаміў, што праз расейскі абстрэл па ўсім Кіеве, практычна ў кожным раёне, пацярпелі шматлікія шматпавярховыя будынкі. У прыватнасьці, пажары ў жылых дамах у Падольскім, Саламянскім, Сьвятошынскім, Дзясьнянскім, Абалонскім раёнах. Таксама гарэў адміністрацыйны будынак у Шаўчэнкаўскім раёне.
Пазьней мэр украінскай сталіцы Віталь Клічко паведаміў, што загінулі тры чалавекі.
Колькасьць параненых павялічылася ў параўнаньні зь першай лічбай, цяпер яна складае 25 чалавек, у тым ліку пацярпелі дзесяцігадовае дзіця і цяжарная жанчына. Колькасьць ахвяраў можа быць не канчатковай.
У Галасееўскім раёне абломкі бесьпілётніка ўпалі на тэрыторыю лякарні.
У бомбасховішчах правялі ноч і беларускія ўдзельнікі другога этапу IV Форуму Астроскіх, якія прыбылі ў Кіеў. Пра гэта агенцтву Позірк паведаміў дарадца Сьвятланы Ціханоўскай Франак Вячорка.
Абстраляла Расея ня толькі саму сталіцу Ўкраіны, але й Кіеўскую вобласьць. Наступствы абстрэлу зазналі як мінімум пяць раёнаў. Пацярпелі прыватныя дамы, склады, вытворчыя памяшканьні і аўтамабілі.
Параненыя шэсьць чалавек.
Форум