«Безумоўна, мы вітаем прызначэньне Джона Коўла на гэтую пасаду і вітаем намаганьні прэзыдэнта Трампа па вызваленьні палітвязьняў. Само гэтае прызначэньне сьведчыць, што Беларусь застаецца ў фокусе Злучаных Штатаў, як і пытаньне палітвязьняў», — адзначыў Вячорка.
Ён дадаў, што прызначэньне спэцпасланьніка павінна зрабіць больш эфэктыўным змаганьне за вызваленьне палітвязьняў і камунікацыю па беларускіх пытаньнях у цэлым.
Паводле Вячоркі, Джон Коўл сфакусаваны на тым, «каб выцягваць людзей з турмаў, выцягваць закладнікаў».
«Ён блізкі да самога Дональда Трампа, і мы бачым, што ягоныя перамовы з Лукашэнкам ужо дасягнулі нейкага посьпеху».
«Але нашая задача — ня толькі выцягнуць людзей з турмаў, але і спыніць рэпрэсіі. Іначай людзей будуць выпускаць невялікімі групамі, а потым будуць садзіць новых», — падкрэсьліў Вячорка. І ў гэтай задачы ён бачыць важную ролю прынцыповай пазыцыі Эўрапейскага зьвязу.
«Нават калі Злучаныя Штаты будуць зьмякчаць некаторыя санкцыі, уведзеныя за парушэньне правоў чалавека, Эўрапейскі зьвяз павінен трымаць свае санкцыі», — кажа Вячорка. Бо «задача Лукашэнкі — дабіцца зьняцьця санкцыяў, не мяняючы сваёй палітыкі, ня вызваліўшы ўсіх людзей, не спыніўшы рэпрэсій».
«Таму амэрыканцаў мы просім браць на сябе гуманітарны трэк, вызваленьне людзей, выцягваць з турмаў, захоўваць іх жыцьці, а эўрапейцаў — трымаць санкцыі для больш сыстэмных, доўгатэрміновых пераменаў у Беларусі», — патлумачыў дарадца Ціханоўскай.
Ён адзначыў, што «бальшыня эўрапейскіх санкцый былі ўведзеныя менавіта за вайну супраць Украіны і зьнятыя павінны быць тады, калі гэтая вайна будзе спыненая і калі будзе спынены ўдзел Лукашэнкі ў гэтай вайне».
Франак Вячорка сказаў, што неўзабаве чакаецца вызваленьне новай групы палітвязьняў. І офіс рыхтуецца іх прыняць, забясьпечыць усім неабходным і паспрыяць у легалізацыі і рэабілітацыі ў Літве і Польшчы.
«Лукашэнка хоча вызваліць частку — мы хочам, каб выйшлі на свабоду ўсе і каб спыніліся рэпрэсіі», — адзначыў Вячорка.
«Амэрыканскі бок не наіўны, яны выдатна разумеюць, што такое Лукашэнка, яны разумеюць, як цяжка зь ім размаўляць. І тут вельмі важна быць прынцыповымі і настойлівымі, таму што Лукашэнку амэрыканцы патрэбныя нашмат болей, чым амэрыканцам Лукашэнка», — падсумаваў ён.
9 лістапада прэзыдэнт ЗША Дональд Трамп паведаміў пра прызначэньне Джона Коўла спэцыяльным пасланьнікам ЗША ў Беларусі.
«Ён ужо пасьпяхова дамовіўся пра вызваленьне 100 закладнікаў і мае намер вызваліць яшчэ 50», — напісаў Трамп у Truthsocial.
Таксама Трамп заявіў, што загадзя дзякуе Аляксандру Лукашэнку за яго ўвагу да вызваленьня дадатковых людзей. Лукашэнку Трамп зноў назваў «паважаным прэзыдэнтам Беларусі».
Адміністрацыя прэзыдэнта ЗША Дональда Трампа актывізавала кантакты з афіцыйным Менскам у 2025 годзе.
Пасьля візытаў амэрыканскіх прадстаўнікоў у Менск 21 чэрвеня на свабоду выйшлі і былі вывезеныя зь Беларусі 14 палітзьняволеных, у тым ліку Сяргей Ціханоўскі.
11 верасьня, пасьля чарговага візыту Джона Коўла ў Менск, стала вядома аб вызваленьні яшчэ 52 зьняволеных, якіх вывезьлі ў Літву. Сярод іх быў і вядомы палітык Мікола Статкевіч, які адмовіўся выяжджаць зь Беларусі.
Сёлета ў жніўні Дональд Трамп званіў Аляксандру Лукашэнку і двойчы пасьля гэтага згадаў пра вызваленьне больш як тысячы беларускіх палітвязьняў.
Форум