Аляксандар Лукашэнка назваў рашэньне Літвы закрыць мяжу зь Беларусьсю празь вялікую колькасьць залётаў паветраных балёнаў «вар’яцкай афэрай».
«Канфэрэнцыю чакалі ня толькі мы, але і нашы апанэнты, якія пільна сёньня назіраюць за Менскам. Ня ўсе сёньня павінны былі дабрацца да Менску. Менавіта такую мэту перасьледавалі нашы суседзі, правярнуўшы гэтую вар’яцкую афэру з закрыцьцём мяжы. І нагоду прыдумалі абсурдную. Паветраныя балёны. Нават для такой дробнай краіны, як Літва, гэта дробна», — заявіў Лукашэнка на Менскай міжнароднай канфэрэнцыі ў бясьпецы.
Лукашэнка падкрэсьліў, што ніякай «надзвычайнай кантрабанды» няма.
Ён таксама адзначыў, што Беларусь «не выкарыстоўвае міграцыю» супраць краін Эўразьвязу, і раскрытыкаваў адмову эўрапейскіх краін ад дыялёгу зь Беларусьсю. Хоць раней кіраўнік КДБ ня раз заяўляў, што такія кантакты адбываюцца.
У той жа час ён адзначыў, што вырашэньне мігранцкага крызісу можа стаць часткай «глябальнай угоды».
«Падыход прэзыдэнта Трампа „усё на ўсё“ мы можам абмяркоўваць і з ЗША, і з Эўропай», — заявіў ён.
Пра вайну і крадзеж золатавалютных рэсурсаў
Аляксандар Лукашэнка перакананы, што «драматычныя падзеі ва Ўкраіне і на Блізкім Усходзе» сталі вынікам пасьлядоўнага ігнараваньня прынцыпаў бясьпекі. У той жа час ён не згадаў, што вайну ва Ўкраіне пачала Расея, а яе войскі ўварваліся на ўкраінскую тэрыторыю зь Беларусі.
Паводле яго, «глябальная большасьць» намагаецца сілай прымусіць працаваць на яе інтарэсы, а хто «не прагнецца — таго ізаляваць».
«Іхная палітыка санкцыяў — гэта просты шлях да самаізаляцыі», — заявіў ён.
«Хай, увялі санкцыі, колькі іх ужо было. [...] Вазьміце золатавалютныя рэзэрвы Расеі і Беларусі. Яны ж заўсёды хацелі, каб мы іх захоўвалі дзе? Вывезьлі і што? [...] Дайшлі да таго, што пачалі бяз сораму браць гэтыя грошы як свае, і накіроўваць туды, куды хочуць. Бандытызм і крадзяжы. На гэта трэба неяк рэагаваць, калі амэрыканцы ня хочуць, каб мы выкарыстоўвалі іхны даляр, то трэба ствараць альтэрнатыўную валюту», — сказаў Лукашэнка.
Аб тым, хто вінаваты, і пра заклік да дыялёгу
Аляксандар Лукашэнка лічыць, што ў Эўропе неабгрунтавана называюць яго і прэзыдэнта Расеі Ўладзіміра Пуціна «агрэсарамі» і назваў выдуманымі пляны нападу на Польшчу ці Літву.
«Нам патрэбны дыялёг. Нельга глядзець адзін на аднаго праз прыцэл аўтамата. Ні ў якім разе нельга. Трэба заўжды размаўляць. Калі не размаўляюць, тады вайна бліжэй», – адзначыў ён.
Пры гэтым ён ня бачыць сваёй віны ў пагаршэньні дачыненьняў з заходнімі краінамі.
«Мы ня лічым сябе вінаватымі ў пагаршэньні дачыненьняў з Захадам і яго асобнымі краінамі. Але руку працягваем. Гэта не рука таго, хто просіць. Гэта рука партнэра, які мае ўласную годнасьць і прапануе разам і шчыра працаваць дзеля міру для нашых дзяцей і ўнукаў», – заявіў Лукашэнка.
Дзяржаўны тэлеканал «Першы інфармацыйны» вёў жывую трансьляцыю з канфэрэнцыі.
Форум