Паўночная Карэя пачала будаўніцтва мэмарыялу жаўнерам, якія загінулі ў вайне Расеі супраць Украіны. Пра гэта паведаміла агенцтва AFP з спасылкай на паўночнакарэйскія дзяржаўныя СМІ.
Так званы Мэмарыяльны музэй баявых подзьвігаў будзе пабудаваны ў сталіцы Пхэньяне, дзе Кім Чэн Ын і пасол Расеі ў Паўночнай Карэі прысутнічалі на цырымоніі закладкі першага каменя, паведамляе Цэнтральнае інфармацыйнае агенцтва Карэі (KCNA).
Кім, выступаючы на мерапрыемстве, сказаў, што музэй «гэта сьвятое месца, прысьвечанае неўміручасьці сапраўдных патрыётаў».
Паўночная Карэя, адна з самых дыпляматычна ізаляваных краін сьвету, паглыбіла сувязі з Расеяй пасьля ўварваньня Масквы ва Ўкраіну ў лютым 2022 году. Яна адправіла тысячы жаўнераў і ёмістасьці са зброяй, каб дапамагчы Крамлю выцесьніць украінскія войскі з Бранскай вобласьці Расеі.
Паводле ацэнак Паўднёвай Карэі, прынамсі 600 паўночнакарэйскіх салдат былі забітыя, а тысячы параненыя.
У сваім выступе, перададзеным KCNA, Кім высока ацаніў войскі сваёй краіны за дапамогу Расеі ў дасягненьні «рашучай перамогі».
Ён дадаў, што дачыненьні паміж Паўночнай Карэяй і Расеяй «цяпер дасягаюць свайго гістарычнага піку».
«Пхэньян заўсёды будзе з Масквой. Наша сяброўства і адзінства будуць доўжыцца вечна», — сказаў Кім.
Таксама ён сказаў, што ў мэмарыяле будуць устаноўленыя скульптуры, прысьвечаныя паўночнакарэйскім жаўнерам, якія ваявалі ў Расеі, а таксама фатаграфіі і творы мастацтва, якія адлюстроўваюць баявыя дзеяньні.
Пасол Масквы ў Паўночнай Карэі Аляксандар Мацэгара і іншыя супрацоўнікі расейскай амбасады прысутнічалі на цырымоніі ў чацьвер, паведамляе KCNA.
Таксама на цырымоніі прысутнічалі некалькі паўночнакарэйскіх урадавых і вайсковых чыноўнікаў, а таксама сем'і тых, хто загінуў у Расеі.
Раней у Маскве выставілі партрэты паўночнакарэйцаў, якія загінулі ў вайне за Расею.
Форум