Як паведамляе сайт «Правда Гомель», у шэрагу выпадкаў сабраныя людзьмі грыбы выявіліся заражанымі цэзіем і стронцыем.
У сушаных грыбах з Нараўлянскага раёна ў прыватнасьці выявілі перавышэньне ўзроўню радыяцыі больш чым у шэсьць разоў.
«У верасьні падразьдзяленьні радыяцыйнага кантролю тэрытарыяльных цэнтраў гігіены і эпідэміялёгіі Гомельскай вобласьці правялі дасьледаваньні 699 проб харчовых прадуктаў і 61 пробы вады на ўтрыманьне цэзію-137», — паведамляе сайт.
З прыватнага сэктару дасьледавалі 568 проб харчовых прадуктаў, перавышэньні гігіенічных нарматываў выяўленыя ў 17: у 14 пробах грыбоў сьвежых і прадуктах іх перапрацоўкі, у 3 пробах грыбоў сушаных.
Перавышэньні зарэгістраваныя ў Веткаўскім, Ельскім, Калінкавіцкім, Кармянскім, Нараўлянскім, Хойніцкім раёнах. Так, паведамляецца, што пры нарматыве 500 Бк/кг узроўні колькасьці цэзію-137 у пробах грыбоў свежых і прадуктаў іх перапрацоўкі склалі ад 503 (Ельскі раён) да 1828 Бк/кг (Кармянскі раён). Пры нарматыве 2500 Бк/кг узровень утрыманьня цэзію-137 у пробах грыбоў сушаных склаў ад 2548 Бк/кг (Веткаўскі раён) да 16399 Бк/кг (Нараўлянскі раён), — піша «Правда Гомель».
Што важна ведаць пра аварыю на Чарнобыльскай АЭС
Аварыя на Чарнобыльскай АЭС 26 красавіка 1986 году лічыцца самай вялікай тэхнагеннай катастрофай XX стагодзьдзя.
- У атмасфэру было выкінута радыеактыўных рэчываў у 300 разоў больш, чым пасьля атамнага бамбаваньня Хірасімы ў 1945 годзе.
- З усіх краін ад наступстваў чарнобыльскай катастрофы Беларусь пацярпела найбольш — на тэрыторыі Беларусі асела звыш 70% радыенуклідаў, найбольш забрудзіўся 21 раён.
- З 2,2 мільёна чалавек, якія жылі на забруджаных землях, эвакуавалі і адсялілі 138 тысяч, яшчэ каля 200 тысяч самі зьехалі з пацярпелых тэрыторый.
- У 1986 годзе падчас аварыі на ЧАЭС з разбуранага рэактара было выкінута 1850 пэтабэкерэляў радыенуклідаў, пры гэтым на долю радыеактыўнага цэзію прыпала 270 пэтабэкерэляў. Пэрыяд паўраспаду цэзію-137 — 30 гадоў. Гэта значыць, што на 2016 год яго колькасьць на тэрыторыі Беларусі зьменшылася ўдвая.
Форум