Пра гэта паведамляе Euronews.
З пачатку 2025 году Польшча прадухіла каля 28 тысячаў спробаў парушэньня мяжы зь беларускай тэрыторыі, у тым ліку за 19 дзён кастрычніка — 1590.
Адзін са спосабаў, які мігранты выкарыстоўваюць для абыходу памежнай аховы, — гэта тунэлі. Нядаўна супрацоўнікі Падляскага памежнага ўпраўленьня выявілі тунэль пад памежным плотам на польска-беларускай мяжы. Гэта другі тунэль, знойдзены ў Польшчы сёлета.
Улады ўсё яшчэ расьсьледуюць, хто і калі выкапаў гэты тунэль. Варшава абвінавачвае Беларусь у дапамозе мігрантам у незаконным перасячэньні мяжы. Яшчэ ў 2021 годзе Аляксандар Лукашэнка абвясьціў, што паколькі краіны ЭЗ уводзяць адносна Беларусі санкцыі, Менск больш ня будзе стрымліваць паток мігрантаў. З 2021 году штогод нелегальна спрабуюць трапіць зь Беларусі ў памежныя Латвію, Літву і Польшчу дзясяткі тысячаў мігрантаў з краінаў Поўдня.
У 2025 годзе Польшча завяршыла будаўніцтва электроннага плоту ўздоўж усёй мяжы зь Беларусьсю. Кошт праекта склаў 136,6 мільёна далараў.
Тунэлі на сэрбска-вугорскай мяжы
Аднак Польшча не адзіная краіна, якая сутыкаецца з праблемай кантрабандных тунэляў. Вугоршчына сутыкалася з той жа праблемай: вугорская паліцыя знайшла тунэль даўжынёй 24 мэтры на мяжы з Сэрбіяй. Аб гэтым паведамлялі сэрбскія СМІ ў чэрвені 2020 года. Гэта быў ужо трэці тунэль, знойдзены ў Вугоршчыне.
Вугорская паліцыя ўжо ў 2019 годзе выявіла два такія тунэлі, якія мігранты выкарыстоўвалі для таго, каб з сэрбскага боку трапіць у Заходнюю Эўропу. Адзін тунэль каля населенага пункта Ашотхалам быў даўжынёй 34 мэтры. 44 мігранты і адзін кантрабандыст былі затрыманыя. Другі тунэль у вёсцы Чыкерыя быў даўжынёй 21,7 мэтры.
Прэм’ер-міністар Вугоршчыны Віктар Орбан ужо даўно заклікае да новых законаў для стрымліваньня прытоку мігрантаў і папярэджвае аб рызыках. У 2015 годзе, на піку міграцыйнага крызісу, Вугоршчына ўсталявала калючы дрот на сваіх паўднёвых межах, каб стрымаць паток людзей, якія накіроўваюцца ў Заходнюю Эўропу.
Форум