Гэты дзень у гісторыі
З 17 па 21 жніўня 1995 году адбыўся страйк працаўнікоў Менскага мэтрапалітэну — сяброў Свабоднага прафсаюзу, якія дамагаліся паляпшэньня эканамічных умоваў працы. Страйк быў жорстка здушаны ўладамі, яго ўдзельнікаў на гады ўнесьлі ў чорныя сьпісы.
Машыністы, іхныя памочнікі й сьлесары вагоннага дэпо Менскага мэтрапалітэну пратэставалі супраць парушэньня кіраўніцтвам мэтро калектыўнай дамовы й тарыфнага пагадненьня. Перамовы з прадстаўнікамі ўладаў, якія зьявіліся ў дэпо, не далі плёну. Тады ўлады знайшлі штрайкбрэхераў — машыністаў электрычак Беларускай чыгункі й цягнікоў маскоўскага мэтро, якіх спэцыяльным авіярэйсам з расейскай сталіцы даставілі ў Менск. Падземны рух быў адноўлены, але страйк працягваўся.
Пазьней пачаліся арышты, суды, звальненьні. Шэраг удзельнікаў страйку апынуліся за кратамі. 56 чалавек звольнілі, і цягам гадоў яны не маглі ўладкавацца на працу. Пазьней адпомсьцілі астатнім: з розных прычынаў урэшце звольнілі некалькі соцень чалавек. 1995 год у Беларусі вызначыўся масавымі выступамі працоўных, якія перадусім патрабавалі падвышэньня заробкаў. Страйк на Менскім мэтрапалітэне быў задушаны асабліва жорстка і паказальна для іншых. Загад аб задушэньні страйку даў тагачасны міністар унутраных справаў Юры Захаранка.
1655 — падпісаная Кейданская вунія паміж ВКЛ і Швэцыяй у часе 13-гадовай вайны.
1903 — амэрыканскі выдавец, журналіст Джозэф Пулітцэр заснаваў Пулітцэраўскую прэмію.
1920 — у Менску пачаліся перамовы аб міры паміж Савецкай Расеяй і Другой Рэччу Паспалітай.
1962 — першы забіты пры спробе перайсьці Бэрлінскую сьцяну. Усходненямецкія памежнікі забілі 18-гадовага Пэтэра Фэхтэра.
1980 — у польскім горадзе Гданьску ўлады прынялі 21 патрабаваньне страйкоўцаў.
1998 — расейскі ўрад абвясьціў дэфолт па фінансавых абавязаньнях.
2020 — звольнілі дырэктара Купалаўскага тэатру Паўла Латушку, які ўзяў удзел у «Маршы свабоды». Каля 50 актораў напісалі заявы на звальненьне.
2020 — у Беларусі практычна на ўсіх прадпрыемствах ствараюцца страйкамы, патрабуюць адстаўкі Лукашэнкі.
У гэты дзень нарадзіліся
1629 — Ян Сабескі, кароль польскі і вялікі князь літоўскі.
1857 — Ян Цепляк, рымска-каталіцкі царкоўны дзеяч Літвы і Беларусі.
1907 — Зьдзіслаў Стома, беларускі актор тэатру і кіно. Народны артыст Беларусі і СССР.
1943 — Робэрт Дэ Ніра, амэрыканскі актор.
У памяці
1676 — Ганс Якаб Крыстофэль фон Грымэльсгаўзэн, нямецкі пісьменьнік, аўтар папулярнага раману «Авантурнік Сімпліцысімус», аднаго з найвыбітнейшых твораў нямецкай літаратуры XVII ст.
1850 — Хасэ дэ Сан Марцін, кіраўнік вайны за незалежнасьць гішпанскіх калёніяў у Паўднёвай Амэрыцы.
