26 чэрвеня 2025 году Сяргей Ціханоўскі, вядомы відэаблогер, аўтар праекту «Краіна для жыцьця» і былы палітвязень, сустрэўся зь беларусамі ў Варшаве. Сабралі асноўныя цытаты Сяргея, а таксама палітыкаў і ўдзельнікаў мітынгу.
Сьвятлана Ціханоўская
Дарагія мае беларусы і беларускі, Сяргей на свабодзе — і ён жывы і няскораны.
Сяргей Ціханоўскі
Ведаеце, незадоўга да таго, як мяне ў Горадні затрымалі, там крычалі: „Ці-ха-ноў-скі!“
Каму трэба дзякаваць за тое, што я апынуўся на свабодзе? Некаторыя кажуць, Дональду Трампу. Розныя ёсьць вэрсіі. Я вам скажу, каму трэба дзякаваць. Толькі вам. Вось толькі вам! Бо калі б ня вашыя намаганьні, то ніхто б ня слухаў і маю жонку. Калі б ніхто ня слухаў маю жонку, то, адпаведна, Дональд Трамп нават ня ведаў бы майго прозьвішча.
Да мяне ўжо ад жніўня мінулага году прыяжджалі памочнікі генэральнага пракурора. І далей — агенты КДБ пачынаюць: «Напішы на памілаваньне, і мы цябе выпусьцім». Тры гадзіны ён мяне пераконвае: «Напішы — і ты пойдзеш дадому».
Як я магу напісаць на памілаваньне, калі я не ўчыняў ніколі гэтых злачынстваў? Я б на судзе прызнаў — навошта мне такі велізарны тэрмін? Я не ўчыняў гэтых злачынстваў, я не магу гэта прызнаць. Я не магу здрадзіць сваёй жонцы і не магу здрадзіць вам, тым, хто ў мяне паверыў, хто пайшоў за мной, і асабліва тым, хто быў у ініцыятыўнай групе.
Я кажу: «Ну вы ж разумееце, што вы мяне ні за што трымаеце — увогуле ні за што. Я не ўчыняў ніякага крымінальнага злачынства — увогуле ніякага». «Але ж памятаеш, як ты на 9 траўня арганізоўваў антыпарад у Бабруйску? Калі перакрылі ўвесь Бабруйск, каб ніхто зь іншых гарадоў нават ня ўехаў. І ты тады сказаў такую фразу: „Калі я арганізаваў такое на 9 траўня, уявіце, што я арганізую на 9 жніўня“». Вось і ўсё маё абвінавачаньне.
Давайце ўсе разам яшчэ зробім пэўныя намаганьні, прыцягнем увагу да нашай праблемы, каб і ўсе астатнія палітвязьні выйшлі на свабоду.
Вагі ў мяне напалову менш, але я той самы чалавек. Я хачу, каб вы паверылі ў мяне і зараз.
Калі вы ў мяне паверыце, я абяцаю зрабіць усё, каб мы вярнуліся ўсе ў Беларусь і там былі сапраўдныя, сумленныя, дэмакратычныя выбары.
Сябры, асабіста я зьбіраюся гэты рэжым зламаць, як і той турэмны. І нават калі вы будзеце мне слаба дапамагаць ці зусім ня будзеце дапамагаць, я ўсё роўна буду ламаць гэты рэжым.
Слухайце, у СІЗА КДБ, у «Амэрыканцы», нядаўна крычаў, сьпяваў «Муры рухнуць» і па-расейску, і па-беларуску. У самім КДБ!
Усё падрыхтавана, хлопцы, трэба ціснуць — і мы ўсе выйдзем.
Павал Латушка
(Кіраўнік Народнага антыкрызіснага ўпраўленьня)
Мы зараз знаходзімся ў тым ліку на інфармацыйнай вайне. І мы сапраўды маем вось гэтую зброю — F-35. І гэта Сяргей Ціханоўскі!
Пяць гадоў катаваньняў, інкамунікада, моцных зьдзекаў. І чалавек пасьля пяці гадоў выходзіць з такой энэргіяй! Гэтая энэргія, якая зараджае. Гэта энэргія волі і барацьбы.
У нас ёсьць адзін вораг. І ў нас ёсьць адна радзіма — Беларусь. Вызваліць яе ад ворага — вось у гэтым мы павінны аб’яднацца. І мы чуем, што ён гатовы гэта рабіць. І мы будзем падтрымліваць яго ў гэтым.
Удзельнікі мітынгу
Веру ў тое, што энэргія Сяргея разварушыць усіх беларусаў — тых, якія тут аселі, асыміляваліся. Трэба памятаць, што ў Беларусі засталося яшчэ вельмі шмат людзей, якія сядзяць, гэтага ўсяго ня бачаць, якія страцілі веру.
Уражаньні добрыя, але галоўнае, каб быў вынік. А вынік паглядзім, які будзе… 5 гадоў ужо. Хачу дадому, вельмі хачу дадому ў Горадню, свой любімы каралеўскі горад, самы пратэставы горад Беларусі, які быў у 2020 годзе. Крыўдна за свой горад было, што менавіта ў ім гэтая правакацыя была.
Я не зусім поўная прыхільніца ягоных поглядаў, але, я лічу, любое дзеяньне важнае ў барацьбе супраць рэжыму. Як бы мы ні ставіліся да кожнага з апазыцыйных дзеячаў, мы павінны быць разам, бо толькі разам мы можам перамагчы.
Я вельмі задаволены, што Сяргей выйшаў на свабоду. Мне ўдалося перакінуцца зь ім парай словаў, патрымаць яго за руку. Я заўсёды гатовы яго падтрымліваць. Гэта для мяне прыклад. Каб былі ўсе такія, то мы ўсе даўно перамаглі б.
Я адчуваю эмацыйны пад’ём, як і ўсе навокал. Сяргей, нягледзячы на тое, што яго спрабавалі зламаць, ня страціў свайго стрыжня. Я думаю, ён зарадзіць усіх нас гэтай надзеяй. Мы дакладна пераможам, я гэта сёньня зразумеў.
Форум