Тэкст пастановы пакуль не апублікаваны. У афіцыйным паведамленьні ведамства адзначаецца, што гэтае рашэньне датычыць 131 спэцыяльнасьці.
«Вызначаны пералік спэцыяльнасьцяў, профільных іспытаў у форме АДЭ (адзінага дзяржаўнага экзамэну. — РС), здадзенага ў Расеі, і колькасьць месцаў вочнай (дзённай) формы атрыманьня адукацыі за рахунак сродкаў рэспубліканскага бюджэту, на якія могуць быць залічаныя расейскія абітурыенты», — паведамілі ў Міністэрстве адукацыі Беларусі.
Сярод такіх спэцыяльнасьцяў — «спэцыяльная і інклюзіўная адукацыя», «мікра- і нанаэлектроніка», «бесьпілётныя авіяцыйныя комплексы», «штучны інтэлект», «кібэрбясьпека» і іншыя.
У Мінадукацыі дадалі, што расейцам прапануюць 863 бюджэтныя месцы. «Лічба аналягічная прыёму ў 2024 годзе», — падкрэсьлілі ў ведамстве.
Найбольш месцаў — 35 — прадугледжана на спэцыяльнасьць «вэтэрынарная мэдыцына» ў Віцебскай дзяржаўнай акадэміі вэтэрынарнай мэдыцыны, яшчэ 20 прадугледжана на спэцыяльнасьць «вытворчасьць прадукцыі расьліннага паходжаньня» ў Беларускай дзяржаўнай сельгасакадэміі.
Форум