Як паведаміла агенцтва Reuters з спасылкай на дзяржаўныя СМІ М’янмы, у краіне з 1 красавіка абвясьцілі жалобу на сем дзён.
У горад Мандалай, які апынуўся ў цэнтры землятрусу, прыбыў каардынатар надзвычайнай дапамогі ААН Том Флэтчэр.
«Маштабы разбурэньняў ашаламляюць. Загінулі людзі. Дамы разбураныя. Сродкі для існаваньня зьнішчаныя. Але стойкасьць насельніцтва неймаверная», — напісаў каардынатар ААН на сваёй старонцы ў сетцы X.
4 красавіка Ўпраўленьне Вярхоўнага камісара ААН ў правах чалавека заявіла, што вайсковая хунта абмяжоўвае пастаўкі дапамогі ў пацярпелыя раёны., насельніцтва якіх не падтрымлівае яе праўленьне.
Вайскоўцы, якія захапілі ўладу ў М’янме, абвясьцілі аб спыненьні агню да 22 красавіка, каб палегчыць наданьне дапамогі пацярпелым ад землятрусу. Гэта адбылося пасьля таго, як некалькі вядучых груповак паўстанцаў, якія змагаюцца супраць хунты, абвясьцілі аб спыненьні баявых дзеяньняў на месяц.
Вярхоўны камісар ААН у правах чалавека Фолькэр Цюрк заявіў, што спыненьне баявых дзеяньняў павінна суправаджацца забесьпячэньнем бесьперашкоднага доступу выратавальнікаў і гуманітарных супрацоўнікаў ва ўсе пацярпелыя раёны.
Землятрус магнітудай 7,7 адбылося 28 сакавіка, на наступны дзень пасьля вайсковага параду ў сталіцы М’янмы. Найбольш разбурэньняў адбылося ў горадзе Мандалай, які зьяўляецца другім па велічыні горадзе М’янмы з насельніцтвам больш за адзін мільён чалавек. Штуршкі адбыліся таксама ў Тайляндзе, Віетнаме і Кітаі.
Улады Беларусі накіравалі ў М’янму самалёт зь беларускімі ратавальнікамі з падразьдзелу «Зубр». У першай камандзе падразьдзелу было 33 беларускія выратавальнікі, 2 кіналягічныя злучэньні, 2 адзінкі тэхнікі, рыштунак для аказаньня дапамогі пацярпелым.
Пазьней улады паабяцалі накіраваць другую частку каманды і ўласна гуманітарную дапамогу.
5 красавіка ў Міністэрстве надзвычайных сытуацый Беларусі паведамілі, што беларускія выратавальнікі працягваюць пошук на адным з участкаў, дзе, паводле мясцовых жыхароў, пад заваламі могуць знаходзіцца 4 чалавекі.
«Праца ідзе ў надзвычай цяжкіх умовах: вузкія замкнёныя прасторы, будаўнічы пыл і сьпёка. Да беларускіх выратавальнікаў працягваюць зьвяртацца па мэдычную дапамогу жыхары горада», — адзначаецца ў афіцыйным паведамленьні МНС Беларусі.
Форум